Diferente factor a crea situacion fragil cual resulta den caida di frecuencia
ORANJESTAD (AAN): Den corto bisa, e investigacion interno y externo riba e blackout di Diasabra 5 di Juli 2025, a indica cu e interupcion total di coriente tabata resultado di un combinacion di diferente factor.
Esey ta loke CEO di WEB Aruba, Alfredo Koolman a informa durante un conferencia di prensa. E falta di un risk assessment pa trabao planea riba e sistema di vapor, e desactivacion no detecta di e sistema Intelligent Load Shedding (ILS), y e capacidad limita di e UPS cu ta esencial pa lanta e planta despues di un blackout, a crea un situacion fragil cu eventualmente a resulta den un caida di frecuencia y un blackout total.
Manera ta conoci, riba Diasabra 5 di Juli 2025 pa 12:30 pm, coriente a bay tur rond di Aruba. Pa algun habitante riba e isla, dentro di 90 minuut a logra haya coriente bek. Sinembargo tin hopi cas y negoshi cu a keda 5 ora largo sin coriente.
WEB Aruba ta tuma responsabilidad di e incidente aki cu seriedad. A tuma medida interno pa fortalece ownership, accountability y custodianship den tur nivel di operacion pa asina preveni ripiticion. E blackout di 5 di Juli ta un recordatorio di e importancia di evaluacion continuo y preparacion tecnico, y WEB ta compromete pa sigui optimalisa su sistema y procesonan.
Segun Koolman a declara: “Nos esfuerzo ta refleha den e progreso concreto cu nos a logra den e ultimo añanan. Den 2022, tabatin un promedio di 80 dia entre blackoutnan. Den 2023/2024, e cifra a subi pa 330 dia y den 2024/2025, e promedio a yega 550 dia entre blackoutnan. Sinembargo nos ta consciente cu cada blackout ta uno di mas.”
E CEO a finalisa gradiciendo comunidad pa su comprension y confianza continuo. WEB Aruba ta keda firme den su compromiso pa transparencia, sostenibilidad y un suministro di energia confiabel pa tur habitante di Aruba.
