Uso di tapaboca ta bolbe bira obligatorio y ta reintroduci Orario di Ciere

Crisis Team y Gobierno ta anuncia cambio di maneho Covid-19 - *Variante Delta ta predomina den 80% di e casonan

ORANJESTAD (AAN): Diahuebs atardi, Crisis Team y Gobierno a convoca un conferencia di prensa extraordinario pa trece dilanti un actualisacion pa loke ta e casonan di Covid-19 y mesora anuncia algun cambio importante den e maneho.

Prome Minister Evelyn Wever-Croes a referi na e cifranan di Covid-19 na Aruba unda el a remarca e aumento drastico di casonan nobo.

A yega asina leu atrobe, a expresa, y aworaki tin 128 caso nobo y 675 caso activo cu ta cifranan cu ta surpasa e drempel. Y mester frena plamamento di e virus, e mandatario a remarca.

Por a mira cu e ultimo piek tabata na Maart 2021 y pa aworaki cualkier medida cu ta wordo tuma e resultadonan lo wordo mira aki dos siman.

Na Hospital, te cu diahuebs tabata tin 21 persona di e personanan aki 19 no ta vacuna y esaki ta representa 90 %.

E variante Delta ta predomina den un 80 % di e casonan na Aruba y esey ta un gran mayoria. Delta ta e variante cu ta mas contagioso y ta causa mas problema, premier Wever-Croes a duna di conoce.

 E averahe di casonan na Aruba te cu diahuebs 5 di Augustus tabata 78 caso pa dia. Si e situacion sigui asina e consecuencianan di e aumento aki lo wordo refleha den mas personanan interna y Hospital lo yena.

Tambe mester tene cuenta cu scol ta cuminsa aki dos siman y si no frena e situacion aki hopi hoben y mucha ta bay haya e virus aki y ta bay perde scol. Si nan ta cuminsa aña escolar ta perde scol, tur mayor sa kico ta bay pasa pa e resto di aña y esey lo trece hopi reto cu ne.

Pa loke ta e consecuencianan internacional mester tene cuenta cu Aruba no ta bay cera frontera, pero otro paisnan cu tin hopi caso nan si lo por cera, dependiendo di nan situacion.

No mester lubida cu ya caba Merca a cuminsa cera pa Hulanda.

Aworaki Aruba ta den categoria di risico di un nivel 3 bayendo pa 4 caba cu Merca ta uza y esaki lo por trece consecuencianan tambe pa turismo.

Tin informe cu den sector hotelero tin cancelacionnan ta tumando lugar y si e turistanan ta stop di bin Aruba, e ora lo bay bek na e situacion cu tabata tin den pasado unda hendenan a perde trabao y esey ta locual kier evita, Evelyn Wever-Croes a expresa.

Pesey tur hende mester ta convenci cu esaki ta e momento cu mester frena e desaroyo aki y bin cu cierto medidanan, a bisa. 

Medidanan na vigor entrante diasabra 7 di Augustus:

- Tapaboca ta bira obligatorio paden y pafo di tur establecimento

- Orario di ciere (12 am pa 6 am)

- Gebiedsverbod (prohibicion di areanan publico: parkinglot, beach) 12 am - 6 am

- Alcohol-Verbod  (uzo di alcohol riba propiedad publico ta keda prohibi henter dia)

Premier Wever - Croes a señala cu distancia fisico ta recomendabel pa evita virus por sigui plama. Mientrastanto, e rekisitonan anuncia, pa turista y residente, pa entrada na Aruba ta keda na vigor.

Banda di esaki lo intensiva e vacunacion den e dianan aki, a agrega.

E mandatario a declara cu Aruba a pasa den un situacion asina caba y kier pa un biaha mas ta exitoso, pero pa esaki mester disciplina y compromiso.

E Ministeriele Regeling ta drenta na vigor dia 7 di Augustus 2021.