Carlos Anthony Bermudez (AVP):
ORANJESTAD (AAN): Den e esfuerzo pa diversifica nos economia, paso concreto a wordo tuma cu un atencion special riba sectornan emergente manera FinTech, mercado di crypto currency, Forex (comercio di moneda) y comercio di stock/accion.
Riba 7 di februari 2025, Minister Geoffrey Wever a tene un reunion cu Comision Economico di Nacionnan Uni pa Latino America y Caribe (UN-ECLAC), den cuadro di un estudio enfoca, entre otro, riba FinTech, Blockchain y Cryptocurrencies.
Basa riba e reunion aki, den un carta fecha 11 di april 2025, Parlamentario Carlos Anthony Bermudez, di fraccion di AVP, a solicita na Presidente di Parlamento, Sr. Marlon Sneek, pa percura cu un serie di preguntanan dirigi na Minister Wever yega na su oficina.
Un di e preguntanan tabata:
“Minister por indica ki dia lo termina e estudio aki y ki dia Staten di Aruba lo haya un copia di e rapport?”
Riba 21 di juli 2025, e rapport “Recommendations for fintech sector development and leveraging of artificial intelligence and blockchain technology in Aruba” a wordo publica y riba 14 di augustus 2025, e autornan, Sr. Dale Alexander y Sr. Kwesi Prescod, a presenta su contenido.
Proximo paso
E rapport ta representa e promer stap. E siguiente fase ta inclui palabracion cu Hulanda, entre otro atraves di Landspakket, pa determina con e proyecto lo sigui y cu tipo di apoyo Hulanda lo ofrece. E meta ta pa cu ciudadanonan di Aruba por tin acceso rapido y simpel na e mundo di Financial Technology (FinTech) sin mester enfrenta obstaculonan innecesario.
Un obstaculo\beer menos riba caminda
Durante e rond di pregunta na final di e presentacion, Centrale Bank Aruba (CBA) a duna di conoce den un manera explicito cu no tin prohibicion legal pa compra di crypto moneda. Si un persona tin e fondo necesario y kier cumpra crypto moneda, no tin ley cu ta stroba of prohibi tal transaccion.
E pregunta ta: dicon banconan comercial (aki na Aruba) ta prohibi e compra di crypto moneda pa nan cliente?
Actualmente, esnan cu ta purba cumpra crypto moneda via credit card ta wordo confronta cu bloqueo di na credit card.
Parlamentario Bermudez ta spera cu a corto plazo e obstaculo(nan) lo por wordo elimina.
Den e revolucion digital, no tin medio paso: of bo ta parti di e progreso of bo ta keda atras.
Ta ora pa nos tur wak progreso, tanto pa nos pueblo como pa nos pais.
