Francis Gomez di DOW:
ORANJESTAD (AAN): Francis Gomez, Hefe di e Afdeling Ontwerp & Planning di Departamento di Obranan Publico (DOW) ta e persona encarga cu e proyecto di mantencion di caminda. El a duna di conoce cu actualmente tin rond di 1185 kilometer di caminda y 72 kilometer ta cay bao di e proyectonan PPP, esta Green Corridor y Watty Vos Boulevard y e resto di 1113 kilometer ta cay bao maneho di DOW.
Gomez a sigui splica cu pa e parti di PPP, Green Corridor ta cay bao di un contract pa un periodo di 18 aña y esey a cuminsa na 2018 te cu 2036. Como parti di nan responsabilidad tambe ta e parti di mantencion di e camindanan aki.
E parti di Watty Vos Boulevard tambe ta similar y su duracion ta 20 aña. A cuminsa na 2019 y lo finalisa na 2039. Nan responsabilidad tambe ta keda e parti di mantencion.
Francis Gomez a agrega cu di e 1113 kilometer di caminda cu ta cay bao di DOW, rond di 846 kilometer ta di asfalt y 267 kilometer ta di caminda di santo.
E fondonan cu ta disponibel pa DOW pa por haci trabaonan di mantencion ta limita, pero por bisa cu e ultimo añanan a haci hopi trabao conhuntamente cu otro departamentonan cu aprobacion di gobierno pa despues haci un evaluacion y cuminsa un plan structura di largo plaso pa mehoracion di e camindanan, el a señala.
For di e evaluacion cu resulta lo mester mas o menos di 18 miyon florin pa aña pa e periodo di 20 pa 25 aña pa por atende cu e deterioro cu tin den infrastructura. Pa por yega na e fondonan, a haci e trabaonan administrativo necesario y ta wardando e aprobacion y pa fin di aña cuminsa cu e trabaonan.
E lista di trabao y e logistica ta cla. Esaki lo wordo anuncia na comunidad despues, Francis Gomez a declara.
