ORANJESTAD (AAN): Yosmar Maduro-Sneek, Bibliotecario y Hefe di Departamento Publico di Biblioteca Nacional Aruba ta
masha contento cu un aña a pasa exitosamente despues cu na 2024, Sala Safiro a habri den cuadro di 75 aniversario di trabao di biblioteca.
El a bisa den entrevista cu DIARIO cu en berdad a pasa cu nan a celebra nan 75 aña, dia 20 di augustus 2024 y awor ta bayendo pa 76 aña caba. Tabatin hopi actividad cu nan a haci na ocasion di e aniversario y cu durante di e aña a tuma luga.
A inaugura e logo nobo, entre otro y actualmente nan ta participando den un ‘community art project’ unda cu tur hende di biblioteca ta traha ariba un mosaico cu kier pa keda cla pa dia 20 proximo, pero cu si no logra nan lo sigui traha riba dje.
Pa loke ta Sala Safiro nan a haya hopi bon comentario. Hopi hende a pasa bishita e sala ya cu e intencion di e sala ta pa tur hende haya informacion di biblioteca den diferente forma den un manera dinamico, el a bisa.
Cada cuater luna, por ehempel, e exposicionnan ta cambia. Actualmente a inaugura e di tres periodo di expo, cu ta encera un expo comunitario di University of Aruba Toastmasters Club y esun di trahador cu e tema di Pokemon.
Maduro-Sneek a remarca cu un exposicion ta un otro forma di duna informacion. P’esey ta hopi importante pa comunidad sa cu ora di bishita Biblioteca Nacional y drenta Sala Safiro, cu eynan por haya mas informacion. E sala tin su dinamica y e ta algo diferente, el a enfatisa.
Pa e motibo ey ta haya hopi importante pa comunidad di Aruba pasa bishita Sala Safiro, wak kico tin nobo. E expo nobo ta bay keda disponibel te luna di fin di october. Entrante 1 di november lo inaugura un expo nobo, Yosmar Maduro-Sneek a finalisa bisando.
