Ioné Rodriguez, experto di UNOPS:
ORANJESTAD (AAN)-- Ioné Rodriguez, experto di UNOPS, a sigui splica den conferencia di prensa, cu riba e aspecto di prizonnan, UNOPS tin experiencia internacional, na tal punto cu a desaroya loke ta conoci como “TGPP” (Technical Guide for Prison Planning) cu ta un metodologia pa implementa un proyecto di construccion di un prizon nobo.
“UNOPS ta un pionero obsesivo na crea pasonan standardiza y un metodologia pa sigura cu un prizon ta responde na e necesidadnan adecua di e contexto, y por ehemplo nos ta actualmente na Sint Maarten, y prome cu esey tin experiencia den varios pais na Europa y Africa.
“Un di e aspectonan cu UNOPS ta insisti y ta haci su metodologia particularmente efectivo, ta cu e ta insisti cu mester compronde con nos kier opera un prizon pa su infrastructura duna un respuesta na e forma di trabao aki y no al contrario, loke ta sosode hopi biaha unda e sistemanan penitenciario ta haya nan mes obliga na traha den un edificio cu no ta adecuadamente diseña, y p’esey nos ta bolbe na e principio, na reuni cu KIA y cu e Minister di Husticia,
Pa compronde cual ta su necesidadnan y su obhetivonan operacional, p’asina e edificio brinda un servicio acorde na e metodologia aki di trabao”, señor Rodriguez a señala.
