Segun Fernando Vazquez, CEO di Beicad:
ORANJESTAD (AAN): Siman pasa, un grupo di profesional cu ta traha den desaroyo tecnologico internacional a presenta na Aruba un solucion innovador pa trata desecho y na mesun tempo genera energia limpia. E proyecto aki yama ‘The Triple Zeros for Aruba’. Señor Fernando Vazquez, CEO, inventor y desaroyador di e tecnologia di e empresa Beicad, a comparti detayenan di e sistema cu tin como meta yuda Aruba enfrenta su reto ambiental mas grandi: maneho di desperdicio.
Durante su presentacion, Vazquez a expresa su gratitud pa e oportunidad di bishita Aruba y presenta e tecnologia aki. Segun e, pa su empresa, cu tin su base den Uruguay y cu ta traha hunto cu profesionalnan di Argentina, e iniciativa aki ta representa un oportunidad importante pa contribui cu solucionnan sostenibel pa e region.
E tecnologia cu ta wordo presenta ta basa riba un sistema avansa di proceso di desecho cu originalmente a wordo desaroya den ambito militar. Awe, danki na innovacion y investigacion, e mesun principio tecnologico por wordo aplica den ambito civil pa crea solucionnan sostenibel y accesibel.
Segun Vazquez, un di e caracteristicanan mas importante di e tecnologia ta cu e sistema no ta produci emisionnan dañino na atmosfera. E proceso ta cumpra desecho, lo procesa y separa e material pa produci un gas di sintesis. Despues, e gas aki por wordo uza pa genera energia electrico. Di acuerdo cu e inventor, e tecnologia ta cumpli cu e normanan ambiental mas estricto di Union Europeo.
Ademas, e sistema tin e capacidad pa trata diferente tipo di residuo, incluyendo taira, plastic, materialnan medico y desecho di hospital. Segun el a informa, esaki ta pone e tecnologia como un posibel solucion integral den e concepto di economia circular.
Representantenan di e proyecto ta expresa cu, segun nan investigacionnan, nan tin un bon comprension di e cantidad di desperdicio cu Aruba ta produci y di e necesidadnan real di e isla pa uza e gas genera despues di e proceso. Segun Vazquez, e grupo tin confiansa cu nan por aporta un solucion efectivo pa e problema di desperdicio riba e isla.
“Nos tin e solucion,” Vazquez a conclui, expresando su deseo pa contribui na bienestar di pueblo di Aruba y na un futuro mas limpi y sostenibel pa generacionnan futuro.
