Universidad di Aruba ta integra AI den curso di Comprehensive Business Analysis

Pa Studiantenan di e Minor International Financial Management

• Cu docente huesped, empresario di Texas Dr. Tarek Ali 

ORANJESTAD (AAN): E temporada aki, studiantenan di e Minor International Financial Management (IFM) na e Facultad di Accounting, Finance y Marketing (FEF) di Universidad di Aruba a completa e curso Comprehensive Business Analysis (CBA), duna pa docentenan Jorrit van Spaendonck y Anika Stevens. E curso ta e capstone di e minor: e ta reuni tur cos cu e studiantenan a siña y ta pidi nan pa aplic'e na un compania real cotisa na e mercado, for di tur angulo relevante.

   Durante ocho siman, cuatro ekipo di studiante a analisa cada uno un compania di luho cotisa publicamente na mercado; su strategia, posicion di mercado, operacionnan, gobernansa, finanzas y valoracion — y a construi un informe profesional di credito y accion (equity report) di e tipo uza pa analistanan, banconan y inversionistanan. Cada ekipo a wordo combina cu un ekipo opositor cu a cuestiona su hallazgonan, di manera cu cada conclusion a wordo getest prome cu el a wordo presenta.

   AI como un habilidad profesional: Loke ta distingui e edicion di e aña aki ta e manera cu AI a wordo integra den e curso. Anika Stevens a duna tres mainta completo di les introductorio di AI, cubriendo prompt engineering y e diferente aplicacionnan di AI disponibel pa analistanan, di manera cu tur studiante a alcansa e nivel di entrada necesario pa e workshopnan avansa cu a sigui.

   E workshopnan ey a wordo duna pa e docente huesped Dr. Tarek Ali for di Austin, Texas. Dr. Ali, un empresario y serial acquirer cu a cumpra mas di 100 negoschi chikito y mediano, y el a comparti su experiencia practico di valora compania, evita erornan comun y negocia pa yega na un prijs husto: un retorno atractivo na un nivel aceptabel di riesgo. E ultimo dia di su bishita a wordo dedica completamente na AI: el a introduci e studiantenan na algoritmonan y AI di agente (agentic AI), y nan a construi nan mesun agentenan y botnan.

   E enfoke aki ta refleha e posicion di e facultad tocante AI den educacion: studiantenan ta wordo anima pa uza AI, ta keda responsabel pa nan mesun trabao, y ta transparente tocante con y pakico nan a uz'e. Den cada tarea y presentacion, e ekiponan ta duna cuenta di e hermentnan di AI cu nan a uza.

   E facultad ta gradici Dr. Tarek Ali pa su tempo y sesionnan inspirador, y e docentenan Jorrit van Spaendonck y Anika Stevens pa un curso innovativo cu ta prepara e studiantenan pa e profesion manera cu e ta wordo practica awe.