ORANJESTAD (AAN): Den un rueda di prensa di KvK, Director di Camara di Comercio y Industria di Aruba (KvK),
Martijn Balkestein a duna motibonan pa kico KvK ta pensa cu no ta bon pa link e salario minimo na e bestaansminimum. Y tambe el a indica kico si KvK ta kere ta posibel.
El a reitera cu salario minimo ta sigui e inflacion. Esaki segun e, no ta e problema. E problema ta e costo di bida cu ta subi y ta hopi caro na Aruba. Segun e, ta aki mester haci un intento.
El a menciona cu e investigacion cu Economische Bureau Amsterdam (EBA) a haci tambe ta indica cu hisamento di salario minimo ta un medida cu por haci, sinembargo nan ta menciona tambe varios otro posibilidad. Segun e, EBA ta alinea cu pensamento di KvK, cu ta bira tempo pa baha costo di bida.
Ehempelnan cu el a presenta, ta pa entre otro bin cu un huursubsidie, cu ya varios pais ta practica pa yuda esnan cu tin menos recurso. Tambe por introduci prijs mas abou pa awa y coriente cu ta duna mas espacio pa esnan di menos recurso. Baha gasto di importacion, di BBO y invoerrechten cu lo traduci su mes den gastonan mas abou di cuminda entre otro.
Tambe por yuda cu kinderopvang na un prijs pagabel y reduci prijs di transporte publico na unda no ta forsa ciudadanonan pa cumpra auto.
Otro cos cu por haci ta pa yuda famianan cu ta biba den debe, door di haci ahuste den impuesto pa esnan di menos recurso.
Segun el a remarca, KvK ta pro pa sigui aumenta salario minimo conforme e inflacion. E mester ta sostenibel. Esaki kiermeen cu e productividad na Aruba cu ta midi den e GDP mester subi. El a remarca cu den e ultimo 26 aña, e productividad casi no a subi. Y aki tin un problema serio. Si culcula e GDP pa capita, nos ta casi na e nivel di aña 2000.
Pa subi productividad, ta hopi importante tambe, pa haci formacion, educacion of training. E ora por sigui aumenta e salario minimo.
Na final ta importante pa menciona, cu KvK kier traha hunto cu otro gremionan y cu Gobierno pa hisa e poder di compra den un forma responsabel pa evita pa bay den un plan hopi ambisioso y no wordo confronta na final cu consecuencianan negativo cu no ta wordo premira.
“Nos ta lamenta cu nos no tabata envolucra den henter e proceso di e ley. Parlamento a haci e pregunta si gremionan tabata envolucra den henter e proceso. Esaki no tabata e caso y tampoco nos a wak e ley. Y tampoco nos ta pro pa link salario minimo na e bestaansminimo. Pero si nos ta pro pa hisa e poder di compra pero den un forma transparente y rasonabel”, Martijn Balkestein a enfatisa.
