Decano Sue-Ann Lee:
ORANJESTAD (AAN) – Sue-Ann Lee, Decano di e Facultad di “Hospitality & Tourism Management Studies” di Universidad di Aruba, den un entrevista cu DIARIO a elabora tocante e Plan Strategico di U.A 2025-2035. Esaki ta encera un “Multiannual Strategic Plan”, cual señora Lee ta splica seguidamente.
Decano señora Lee a menciona cu na Januari-Februari nan a cuminza cu un proceso di plan strategico, diferente na locual nan tabata tin e añanan atras, na unda nan a busca facilitadornan di afo pa bin yuda U.A cu nan trahado, unda tur hende por a participa, cu e condicion cu U.A ta guia e proceso.
Anteriormente tabata asina cu e strategia tabata guia di ariba, pa wordo implementa. “Na e momento aki nos a cambia e sistema eynan di strategia; nos a dicidi di hacie un approach mas colaborativo, y asina cu nos un facilitador y un grupo grandi di trahado por a participa, p’asina por a contribui na nos strategia 2025 pa 2035. O sea, e ta un ‘Multiannual Strategic Plan, pa Universidad di Aruba”, señora Lee a bisa, agregando cu nan ta bay revisa nan designacion, valor y aspiracionnan y den e parti aki nan ta awo.
“Nos a sinta hunto durante seis luna den un grupo, unda nos a traha riba e diferente puntonan aki, for di nos punto di bista, y awor ta e oportunidad pa nos habrie pa nos studiantenan, trahadornan di U.A, stakeholders, cu por a bin akinan y eigenlijk, wak e trabao cu nos ta haci. Y na mesun momento nos no a caba cu e aspiracionnan pasobra tambe nan por contribui ainda, por ta cu pregunta riba un punto cu nos a pone, of nan ta wak puntonan cu nos no a añadi, y cu nan por pone ainda cu ‘poster notes’. Dus ta nan preguntanan pero tambe interaccion na e momentonan aki”, Decano Sue-Ann Lee a señala.
El a splica ademas, cu esaki ta un Plan Strategico pa diez aña, pero e fase di implementacion ta di cinco aña. E strategia aki cu cual e facilitadornan a yuda U.A cu ne, ta purba di ‘switch out’ y purba di mira mas largo ainda. “Pasobra ora bo ta riba un ‘long term planning’ e parti di implementacion cu accion, nos ta bay sigui traha riba dje e proximo lunanan, ta pa cinco aña”, Lee a subraya.
El a splica cu aki cinco aña nan ta bay re-evalua na unda nan ta, si tin cambio y, tambe, naturalmente nan tin cu wak e impacto riba e studiantenan.
“E impacto global y e impacto di environment aki na Aruba, y tambe e necesidadnan di nos comunidad. Y asina tin hopi factor cu tin un influencia grandi, manera digitalizacion. Na mesun momento como pais nos ta papiando riba ‘environment’ cu hechonan. No ta solamente strategia riba Universidad, pero tambe tin parti riba e curriculum, y pa e necesidadnan cu lo tin ademas di e programanan cu nos ta ofrece caba. Otro punto di atencion cu nos ta wak ta e desaroyo profesional. Asina sondea e oportunidadnan na unda nos ta aworaki y na unda nos kier yega”, Decano, señora Sue-Ann Lee a relata.
