Universidad di Aruba a presenta resultadonan preliminar di estudio tocante sector di hospitalidad na Aruba

ORANJESTAD (AAN):   Dialuna atardi den sala di Universidad di Aruba a presenta e resultadonan preliminar di e estudio cu 'Faculty of Hospitality and Tourism Management Studies'

a haci tocante e industria di hospitalidad na Aruba y e percepcion, satisfaccion y intencion di e empleadonan di Hotel y Resortnan aki na e isla.

            E resultadonan a wordo presenta door di Thais Nierop y Jo-Anne Croes na un grupo significativo di representantenan di e sector di hospitalidad na Aruba como tambe na Minister di Turismo, Dangui Oduber, y na ehecutivonan di entre otro Oficina di Turismo y Aruba Hotel And Tourism Association.

            Jo-Ann Croes a presenta e 'background' di e estudio aki como tambe e proposito cual ta investiga e percepcion, satisfaccion y intencion di e forsa laboral den hotel y resorts na Aruba. Tambe el a splica tocante e fasenan den cual el a wordo traha y e metodologia uza.

            E investigacion a wordo ehecuta pa medio di un encuesta den cual a participa 600 trahador di hotel y resortnan na Aruba.

            E encuesta a inclui preguntanan riba e intencionnan di e empleadonan di bandona e sector, e probabilidad cu e empleadonan ta acepta of busca un trabao den e sector di hospitalidad, e beneficionan profesional percibi, satisfaccion profesional, ekilibrio entre e bida laboral y personal, entre otro.

            Pa loke ta e resultadonan, Thais Nierop a bay den detaye cu lo elabora den un otro articulo. Por remarca cu esaki sigur ta indicadornan basta importante pa loke ta e sector di hospitalidad na Aruba.