ORANJESTAD (AAN): Un di e stakeholders cu cual Formador Evelyn Wever Croes a papia recientemente ta Universidad di Aruba (UA).
Despues di e reunion, rector di Universidad Dr. Viola Heutger a hiba palabra durante un conferencia di prensa, pa laga sa con a bay cu su encuentro cu Formador.
Heutger a bisa indica cu a riba e direccion den cual Universidad kier bay y pa cual tin mester di sosten di Gobierno.
Pesey a papia riba 4 topico, esta ‘Core Business’, Enseñanza y Investigacion, Cooperacion y Governance.
“Na Universidad nos ta boga pa un maneho di enseñanza inclusivo, unda cu nos kier tey pa e studiantenan di Aruba, mientras cu nos kier ta atractivo pa mundo completo”, segun Heutger.
El a sigui bisa cu el a ripara cu e traspaso di alumnonan di HAVO y VWO bay Universidad no semper ta facil y cu esey tambe por wak den e raportnan di e studiantenan cu tur aña ta viaha pa Hulanda.
“Na Universidad di Aruba nos a haya e solucion pa esaki y a introduci e asina yama Academic Foundation Year”.
Nos a wak cu na Aruba tin hopi entusiasmo pa esaki y pesey nos mester incorpora esaki den e maneho di enseñanza, esta e enfoke riba e ‘brug’ di scol secundario pa Universidad, segun Heutger, kende a indica cu e Academic Foundation Year ta funciona bon den esaki.
El a splica si cu nos studiantenan ta wordo confronta cu diferente dificultad, di cual uno ta pa e aña di estudio ey (Academic Foundation), no tin financiamento.
“Pesey nos kier pa e Academic Foundation Year bira parti di e Aruba Lening, of mester bin un fondo di estimulo pa duna studiantenan e posibilidad pa ta financia pa participa na e programa aki”.
Tambe ta importante pa nos haya un bon bista riba locual ta pasa na scolnan, pa nos por haya un idea riba con e generacion di studiante di futuro ta bay ta, segun e rector di UA.
