Tan stima Docter Lin a fayece riba Diasabra anochi

E tabata co-fundador di MEP -  ORANJESTAD (AAN):  E noticia a plama rapidamente Diasabra anochi, cu e conocido Docter Lin di Noord a fayece cu edad di 83 aña.

El a bira malo na su cas na Bubali y hasta Ambulans a bay eynan, pero no por a yuda mas.  E noticia cu el a fayece, inmediatamente a trece un monton di tristeza pa esnan cu conoce di cerca, specialmente su ex-pashentnan.

   Dr. Teodosio Ho King Lin a nace na Aruba riba un Diaranson 13 di April 1938, pero na Censo el a wordo registra dia 14 April.  Su educacion basico el a haya na Aruba mes!  Algun amigo di dje ta corde tempo e tabata bay scol hunto cu nan na Don Bosco School.  Nan ta considera Dr. Lin como un shon di hende y medico, kende semper ta cla pa yuda.

   El a bay Hulanda cu apenas 16 aña di edad pa studia pa medicina.  El a gradua como Medico (Arts) na Universidad di Nijmegen dia 27 Mei 1966.  Asina el a regresa Aruba y dia 1 di Juli 1966 a cuminza traha como funcionario di Salud Publico na Departamento di Salud Publico di Aruba.  Dia 1 di Juli 1967 el a bira Director Interino di Departamento di Salud Publico di Aruba.

  Dia 1 di April 1968 el a cuminza cu su practica general den servicio di Gobierno di Aruba, cu permiso special pa practica priva.  Aki como Docter, y a habri su consultorio di Docter di Cas na Noord, net banda di Centro di Bario Noord.  Un distrito y comunidad cu el a sirbi pa hopi aña!  Un Docter cu tabata yuda hasta hendenan cu no ta su pashent na su policlinica, y esey ta algo cu DIARIO tin’e confirma!

   KEDA STUDIA:

   Algo cu ta hopi notable di Dr. Lin, ta cu desde cu el a gradua na Hulanda, el a sigui studia medicina, e.o. Medicina Integrativo, Medicina Complementario y Alternativo, Medicina di Energia, Medicina Tradicional Chines, Medicina Arjudevic, Medicina Herbal, Terapia Hipnotico, Terapia Spiritual.

   Fuera di esey e tabata atende numeroso curso, lectura, y seminario pa asina keda su mes up-to-date cu avancenan den medicina.  Temanan cu a cubri tanto asuntonan di nutricion, malesanan transmiti sexualmente, asuntonan di malesanan cardiovascular, avancenan den ginecologia, impactonan social di droga, prevencion di atherosclerosis den Caribe, maneho di cancer y di envehecimento, y cada aña tabata haya su actualizacion na Hospital Academico Santa Fe na Bogota, y tambe Seminarionan Anual di Fundacion Antiyano pa clinical higher education.  Algo notable ta cu Dr. Lin ta papia bon tambe e idioma Frances y Aleman.

   Dr. Lin tin 6 yiu, di cual 4 yiu homber di su prome matrimonio, y dos yiu muher Natalie y Sue-Ann desde 1972 cu el a casa cu Gladys Kock.

   Hopi hende tabata aprecia e forma corecto cu Dr. Lin tabata diagnostica su pashentnan.  Mientras algun specialista ta bisa e pashent cu ta cierto malesa e ta sufri di dje, Dr. Lin tabata yega na otro conclusion, y na final ta bin resulta cu e tin razon tambe.  Y riba social media por  anota detayenan asina tambe!  Un dama a bisa cu despues di 3 aña ta busca pa sa cu e pedriatra kico su yiu ta sufriendo di dje, finalmente ta door di un bishita na Huisartsenpost cu Dr. Lin na warda, a saca afo den un rato cu ta alergia e mucha tin.  Esey a yuda cu subsecuentemente e mucha por a haya e tratamento corecto, y cu awor porfin e ta bon.

   Ademas di esey, DIARIO a nota cu varios Docter nobo abiertamente ta bisa cu Dr. Lin tabata nan inspiracion, y nan mentor.  Y esey ta bin debi cu Dr. Teo Lin tabatin e filosofia, cu semper e ta dispuesto pa yuda tur hende!  Na varios ocasion ora cu accidentenan tragico ta socede riba caya na Aruba y cu Centro di Alarma tin dificultad pa haya un Docter pa acudi na e lugar di dalmento, semper nan ta check cu Dr. Lin cu hasta den madruga ta core kita pijama, bisti paña y sali pa bay yuda su conciudadanonan cu ta envolvi den algo grave.

   Pashentnan tabata encanta Dr. Lin, como cu e ta un medico cu ta bisabo y splicabo yen di detaye, kico e condicion di bo salud ta, y kico e embergadura di bo malesa lo trece cune, y loke e pashent tin di haci pa minimaliza efectonan.

   Despues di a atende 3.500 pashent vast di dje, durante 49 aña el a retira dia 1 di Mei 2008.  Pero el a keda activo y tabata yuda reemplaza docternan rond di Aruba.

   DEN POLITICA:

   Dr. Teodosio Lin na 1971 tambe tabata presente ora cu Betico Croes a funda Partido MEP.  Esey ta algo cu semper Dr. Lin a keda corda tur hende riba dje, cu e tambe ta co-fundador di Partido MEP.  Y claro cu e tabata contento y orguyoso di tabata presente ora esaki a tuma lugar.

   El a aparece riba lista di MEP como candidato 26 na e prome eleccion cu Partido MEP a participa na dje.

   E tabata semper den politica, y si mester bisa algo, e ta bisa esey sin miedo pa expresa su opinion.  Su punto di bista tabata haya atencion di su demas coleganan y pashentnan tambe cu tabata scucha su analisis di status di e isla, di economia, y di salubridad publico en general.

   Ultimo añanan, Dr. Lin tabata hopi ocupa tambe ta yudando su propio yiu muher cu tin problema cu pulmon, y a yude den viahenan pa haci varios tratamento experimental na Merca.  Di su banda, e yiu muher Natalie tambe tabata percura pa entretene su tata, door di haci keiro cune, yude den su cuido personal, y por combersa cune di dia y anochi.

   Dr. Teodosio Lin tabata un ferviente lector di DIARIO, y por a confirma cu su famia, cu Dr. Teo Lin a eherce su trabao di medico, te Diasabra anochi cu el a stop di hala rosea.  Pues un total di 55 aña como Docter na Aruba!

   Na famianan di Dr. Teodosio Lin, su amigonan, e.o. Dr. John Croes, su pashentnan, siguidornan, y coleganan di Partido MEP, tanto DIARIO como directornan Famia Mansur ta extende nan mas profundo palabra di condolencia.  Cu Todopoderoso cu a bendiciona Dr. Lin cu e profesion di Medico, tin un lugar special pe den Reino di Señor, y cu e descansa na paz.