NEW YORK: United Nations a haci un yamada riba Diamars na gobierno di Republica Dominicana, pa nan stop di comete actonan cu ta contra derechonan humano di poblacion Haitiano, specialmente cu nan ta deportando muhernan cu ta na estado.
Den un boletin, United Nations a mustra cu nan ta preocupa cu e detencion y deportacion di muhernan na estado, cu tabata buscando of a hasta cuminza ricibi atencion na Clinica y Hospitalnan den varios region di e pais. E accionnan Dominicano aki ta “pone na riesgo e integridad fisico y bida” di e muhernan aki, y no ta cumpli cu e proceso estableci den protocolnan nacional y convencion y standardnan internacional riba deportacion di inmigrantenan.
Pesey awor United Nations ta haci un yamada na Republica Dominicana, specificamente esnan encarga pa aplica e decisionnan tuma pa e Conseho Nacional di Migracion, pa preveni y stop e accionnan aki cu ta violando derechonan humano di poblacion Haitiano, y pa restablece respet pa e dignidad humano ora di stipula leynan den asuntonan di seguridad.
Por corda cu siman pasa, Republica Dominicana a start un campaña pa detene y expulsa muhernan Haitiano cu ta na estado. E hefe di Inmigracion mes, esta Enrique Garcia a bisa cu nan a deporta riba di 100 muher na estado desde Diamars siman pasa. Autoridadnan ta bisa cu e pais no por soporta mas e carga cu esaki ta pone riba atencion medico na e stranheronan den condicion iregular. Aworaki, como 30% di e partonan na Clinicanan publico di e pais, e mama ta Haitiano, y esey a costa Gobierno como 73 miyon Dollar na 2019.
