ORANJESTAD (AAN): Shamila Croes ta boluntario ta Hospice Atardi y el a cuminsa eynan desde cu a organisa e prome opendag tres aña pasa.
Desde cu nan a habri e ta trahando eynan y el a expresa cu esaki ta un lugar hopi bunita pa traha y un experiencia unico ya cu ta keda forma parti di e fase di bida di un persona, cual ta e fase final, den un lugar y ambiente bunita.
Eynan tin un team di profesionalnan y boluntarionan cu ta zorg pa tur cos. Mas cu tur cos ta percura pa e persona ta comodo y pa e haya e atencion cu nan kier, a bisa. "E ta un trabao hopi bunita y hopi fulfilling, den un ambiente hopi ameno, cu coleganan cu por siña tur dia di dje y cu ta traha for di nan curason", Shamila a expresa. El a enfatisa cu tur malesa ta diferente y tambe cada persona ta diferente.
Pesey ta dificil pa duna tips na e famia of na e personanan cu ta den un situacion di un malesa terminal. Sinembargo, el a remarca cu den tur caso e ambiente mester ta uno confortabel pa e persona y cu tur atencion ta bay p'e. E tarea di Hospice ta pa atende cu a pashent, pa asina e famia por bishita nan despues cu mas energia y pasa tempo di calidad cu nan.
"Un tip sigur lo ta pa e ambiente ta confortabel y laga nan haci loke nan lo kier pa asina nan por pasa nan dianan final mas na paz", Shamila Croes a bisa.
Semper ta bon pa busca ademas ayudo spiritual ya cu esaki ta un fase hopi importante y lo ta bon pa tin e espacio emocional, spiritual y mental pa e personanan aki, a agrega. Su deseo ta pa Hospice por sigui crece y keda na Aruba pasobra e ta un lugar special, unico y necesario.
Hopi hende ta pasa den hopi dolor na cas y soledad siendo cu na Hospice semper tin hende rond di nan. Hende por wak pa nan y asina e famia tambe por bin bij un poco . Hospice tey pa e huesped pero tambe pa e famia, a señala.
El a finalisa bisando cu semper Hospice ta den busca di boluntario ya cu nan no lo por draai sin boluntario. "E trabao ta un trabao hopi bunita y ademas tin training pa prepara e boluntarionan".
