United Farmers Aruba no sa kico ta e vision di minister riba Sector Primario

Gregory Fun A Fat:

ORANJESTAD (AAN) – Gregory Fun A Fat, di United Farmers Aruba (UF Aruba), den entrevista cu DIARIO, a menciona cu e conoce como 30 persona cu a pidi tereno pa agricultura, y te dia di awe no a ricibi ni un carta. Esaki ta un parti di e puzzle, pero tin otro aspectonan cu tambe mester traha riba nan, manera e permiso pa construccion.

“Mayoria hende sa cu awendia bo no ta yega planta riba un tereno, bo tin proteha y tin diferente aspecto, nan ta exigi bo un permiso. Pero DOW ta bisa cu riba huurgrond no por construi. Pues, como nos ta bay supera e obstaculonan aki?” Fun A Fat a señala. El a subraya cu tur esaki ta wordo papia, pero e no ta bay mucho lihe.

Aworaki United Farmers ta sintando cu LVV frecuentemente, pa yena e contenido di e MOU (Memorandum Of Understanding). Esaki, gewoon, ta bisa cu nan ta bay traha hunto, pero riba ki topico? Falta pa sa.

Fun A Fat ta spera cu e cosnan di cual nan ta pendiente, ta den e minister su plan. “Pasobra nos como United Farmers tin nos preocupacionnan pero nos no sa ki minister su plan ta”, refiriendo na e minister su vision riba sector primario. UF Aruba kier sa kico e minister su plan ta, si e ta pas cu loke nan como organizacion tin, of kico falta.

“Nos tin un par di aña wardando riba dje y nos a manda un email no mucho tempo pasa, y nos ta spera dentro di poco haya un contesta”, Fun A Fat a expresa, agregando cu hasta tin hende cu a perde interes.

El a agrega cu Parlamento mes a yama United Farmers aden, y nan kier un update. “Mi ta kere ta na su lugar pa nos bisa unda nos ta para awe, y kico nos ta spera, pasobra berdad nos por keda warda riba algo cu por ta, e tey, of no tey. Pero ta yega un momento cu nos tin cu ‘trek on the bell’ y bisa cu  nos tin cu sigui”, Fun A Fat a exclama.

El a agrega cu na April proximo UF Aruba tin e reunion cu tur su stakeholders, nan ta pendiente cu e mesun luna nan por sinta cu e minister, y pa bay Parlamento. Esey ta loke mester pasa na corto plazo, y na termino largo e ta spera un reunion na DIP unda nan por informa un tiki mas tocante e plan na corto, medio y largo plazo.