Pa loke a socede durante entiero
WILLEMSTAD: Famianan a indica claramente, cu den nan concepto ta un berdadero berguenza a keda registra na Misa Catolico na Steenrijk, cu ta keda como 2 kilometer pariba di Punda.
Famianan a declara, cu Pastoor Eduardo di Misa di Parokia La Birgen di Altagracia na Steenrijk a falta e famia respet pa cu nan defunto.
Cierto comentario y predicashi a sali completamente for di contexto y hasta a keda babuca pa mira Pastoor a baha for di altar y bay hisa bos cu un señora den misa. El a haci esey, na momento cu e señora aki a suplica Pastoor cu mester respeta dolor di famia.
E bista aki a pone hopi hende den misa rabia, y riba nan mes a lanta para y sali pafo lagando misa casi bashi. E ta un indicacion cu nan den publico no a aprecia loke a socede, y a manda un mensahe fuerte asina pa Pastoor.
Famia ta hopi indigna cu e falta di respet di Pastoor. Specialmente con e Pastoor “a coba den nan herida”, y tambe “con pastor a actua”. Loke nan a mira socede den Misa, a hasta pone varios hende pensa cu kizas Pastoor aki tabata burachi. Varios persona a condena cu e persona aki cu ta guia iglesia den parokia, no a respeta e dolor di famia cu perdida di nan ser keri.
Famianan a splica, cu despues di e suceso, un otro sacerdote, esta pastoor Guillermo a presenta y pidi famia pordon pa e suceso. Famianan a bise cu esaki lo no keda te aki, y a indica bon cla cu lo entrega un carta oficial na Obispado di Willemstad como keho oficial pa e suceso.
