Unidad di Aviation Business Development di Aeropuerto cu sesion informativo cu aerolineanan asocia

E proximo temporada di winter, Aruba Airport lo ta hopi druk

*Aruba Airport lo inaugura dos ruta nobo na december 

ORANJESTAD (AAN):  E unidad di Desaroyo di Negoshi di Aviacion di e Aruba Airport Authority N.V.’s (AAA) diabierna 17 di november a organisa un sesion informativo dedica na fomenta e colaboracion y e comunicacion cu nos aerolineanan asocia. Como un subunidad integral dentro di e division di Desaroyo di Ingreso y Comunicacion, e unidad di Aviation Business Development team ta desempeña un papel fundamental den e configuracion di e panorama empresarial den e Aeropuerto di Aruba.

            E sesion, na cual e Station Managernan como tambe e representante di e aerolineanan cu ta duna servicio den aeropuerto di Aruba, a conta cu presentacion di e miembronan clave di e ekipo di Aviation Business Development team. Jo-Anne Meaux-Arends, Aviation Business Development Executive, Mary Joan Wardlaw, Customer Relationship Officer y Joanne Trimon, Research & Development Officer,  a ofrece puntonan di bista interesante riba varios tema di interes.

            E agend            a tabata inclui un vision general di e estadisticanan di trafico y e pasaheronan di e aeropuerto di Aruba, c’un perspectiva di futuro te cu 2024.

            E proximo temporada di winter, Aruba Airport lo ta hopi druk, ya cu varios aerolinea, manera American Airlines, JetBlue, Delta Air Lines, WestJet, Southwest, Air Canada, Copa y Air Century, lo aumenta nan capacidad semanal pa e isla. Ademas, Aruba Airport lo inaugura dos ruta nobo na december: Un servicio di Lima (Peru) pa Aruba y otro di Punta Cana (Santo Domingo) pa Aruba cu Air Century.

            Ademas, nos a comparti nos strategia di medio y comunicacion cu e aerolineanan asocia. E departamento ta comprometi na crea un compromiso mucho mas grandi cu e comunidad local, sigurando cu ann ta bon informa tocante e oferta- y destinonan unico cu cada aerolinea ta trece pa Aruba Airport.       Como parti di e compromiso aki, e ekipo a lansa varios campaña promocional durante  aña, incluyendo e campaña actual “Bula Halto cu Spirit Airlines” den colaboracion cu "Na Drempel di Fin di Anja." E campaña aki, cu ta termina dia 24 di november, ta ofrece e participantenan e posibilidad di gana dos pasashi cu Spirit. Tur diabierna nan ta publica preguntanan relaciona cu Spirit riba nan pagina di Facebook y e participantenan mester duna e contesta corecto den e seccion di comentario pa por participa den e campaña.

            Adicionalmente, Julian Chung, Projects & Development Executive, Toy Balentin, Sr. Project Director Gateway 2030 y Paul Hidma, MEP Team Manager di Gateway 2030 Phase 1A for di e Departamento di Desaroyo y Tecnologia, a ofrece un actualisacion detaya di e avancenan di e proyecto ambicioso Gateway2030 di Aruba Airport.

            E sesion di mainta a alcansa su punto culminante c’un reconocimento special otorga na Karen King, Director General di JetBlue tanto na Aruba como na Corsou. A reconoce e contribucionnan destaca di King, particularmente pa su papel decisivo den e lansamento exitoso di e servicio di JetBlue desde John F. Kennedy (JFK) di New York pa Schiphol Airport di Amsterdam (AMS).

Pa finalisa, e Aviation Business Development team kier a expresa su sincero gradicimento na tur e asistentenan pa su participacion activo y su contribucion n’e dialogo. Aruba Airport ta mantene su compromiso di fomenta aliansanan solido y impulsa e exito mutuo den e industria dinamico di aviacion.