Jessica van Montfoort-Posner, PR y Marketing:
ORANJESTAD (AAN) – Jessica Montfoort-Posner, Relacionista Publico y Marketing di FCCA, den entrevista cu DIARIO a bisa cu FCCA tin diferente proyecto cu nan ta bezig cu ne, pa loke ta desaroyo di vivienda.
Actualmente FCCA tin 3.600 persona cu ta riba lista di spera, cu ta un cifra substancial, y nan ta pidi nan si tin algo cu cambia den nan situacion, manera number di telefon, adres, tuma contacto cu FCCA, pasobra si algo bin disponible nan ta sigur cu por tuma contacto cu e cliente.
Pa FCCA ta hopi importante pa haya e fondonan necesario pa por construi mas cantidad di cas posible pa nos comunidad. E fundacion ta bezig cu partnernan pa cu esaki, pero tambe nan ta hopi enfoca pa mehora e productonan cu nan tin pa brinda, hipoteca, specificamente.
“Door di haci esaki mas competitivo y atractivo, tambe nos por yuda mas hende cu cas pero tambe, naturalmente, mehora e entradanan cu nos tin, pa por inverti esaki tambe den nos comunidad. Kiermen, tin casnan pa tur hende cu mester. Manera ta wordo menciona, e grupo ta creciendo”, Van Montfoort-Postner a subraya.
Otro cos cu ta importante, el a bisa, ta cu e tereno ta birando scars, y FCCA ta hopi enfoca den cambia e manera con ta diseña e casnan. “Nos ta bezig cu complexnan di mas piso, nos ta wak con por haci miho uzo di tereno, por ehemplo unda nos tabata traha diez cas aworaki nos ta bin cu trinta. Dus, e ta algo cu nos ta trahando duro riba dje, y tambe e edificionan bieu cu tin na Aruba nos ta bezig pa comberti nan den apartamento of cas”, señora van Montfoort a menciona.
Encuanto construccion cu ta tumando lugar, tin esun na Bucurui cu ta 48 apartamento pa adultonan mayor, y nan lo keda cla na Maart 2024, tambe na Bacu Bakkerij tin un complex cu lo finaliza otro aña of e aña despues. Esaki ta 30 apartamento den otro area pero cu ainda ta den e fase di haya tur e permisonan pero nan ta premira di caba nan den futuro cercano.
Tin tambe otro proyectonan hopi importante cu FCCA ta trahando cu ta den e barionan mes. Aworaki tin un plan pa por mehora e infrastructura den e barionan, cu partnernan manera Santa Rosa, DOW, WEB, y otronan pa wak con por mehora e bienestar den e bario mes. Por ta, con pa uza matanan local di Aruba, pa pone e comunidad biba miho y re-uza awa sostenible.
“Esaki ta algo cu nos ta bay cuminza den algun bario, usa nan como ehemplo, manera De Vuyst, Mabon, Cura Cabay zuid, y despues di e plan aki nos lo sigui cu e otro barionan cu nos tin”, señora Van Montfoort a indica.
El a agrega cu nan ta bezig tambe hunto cu Cede Aruba y Janchi Beton, pa zorg pa e muchanan por tin un lugar pa por hunga, y tin e wow bus tambe, unda cu IBiSA ta bin den diferente bario pa haci actividad cu e muchanan. Esey ta algo cu ta bayendo hopi bon, e dama a señala, y e ta un proyecto cu FCCA ta hopi druk cu ne, tambe.
