STA cu ultimatum pa Gerencia di Triple A:
ORANJESTAD (AAN) – Presidente di Sindicato Trahadornan di Aruba “STA”, den entrevista cu DIARIO a menciona cu tin un situacion reinante na Triple A, principalmente bao Departamentonan cu ta resorta bao e operacion diario di Aeropuerto, trahadornan cu ta traha warda.
“Nos a bin ta analizando e situacion aki pa basta tempo caba, y nos a adverti Triple-A NV, pa stop nan mal practica, stop di viola e contrato colectivo, pero aparentemente nan ta sigui ‘echa nan bainanan’ anto esaki no por continua.
“Nos tin un Contrato Colectivo unda si mi por menciona e cantidad di puntonan di e CAO cu ta wordo viola door di e Gerencia di Triple-A NV, ta increible! Bo tin den e Contrato Colectivo, por lo menos diez articulo cu ta wordo viola; bo tin acuerdonan cu nos a yega na dje tocante di cambio di warda entre e personal di warda, nan ta viola nan, nan ta cambia cos manera nan kier, anto nos ta bisa ‘tende aki’, ta basta”, Diego de Cuba a relata.
De Cuba a aplica cu el a informa e trahadornan cu STA a manda un carta Diaranzon na e Gerencia, cu un ultimatum: E ta duna Triple-A te awe, Diabierna 19 di September, pa nan reuni, y si nan no reuni e ta premira un accion Diasabra awo na Aeropuerto Reina Beatrix.
“Lo mi yama un reunion urgente awe pa combersa cu e empleadonan riba e situacion aki. Nos no por laga e situacion aki sigui escala, pasobra nos a ripara caba ki direccion Aeropuerto ta bayendo, y esaki no por. Aeropuerto practicamente ta bayendo den un direccion di dictadura, y ora bo ta un compania estatal di e pais aki, bo no por bay den e direccion ey, pasobra e ora ey bo mes ta crea caos bao bo empleadonan; bo ta crea un situacion desagradable pa traha aden, anto cada bez tin friccion, problema, y e cosnan aki no ta bon”, Diego de Cuba a señala.
