Presidente di FTA, Hose Figaroa:
*Hopi trahado ta keha di abuso laboral
ORANJESTAD (AAN) – Hose Figaroa, Presidente di FTA (Federacion di Trahadornan di Aruba), den un entrevista cu DIARIO a elabora tocante kehonan cu hopi trahado tin, pa loke ta trata atencion for di Departamento di Labor, na abusonan laboral cu ta tumando lugar.
Esaki FTA ta scucha en general, unda cu tin trahado ta sinti na prome, cu e no tin e proteccion necesario y na di dos, cu ora e ta busca e proteccion ey represalia ta bin riba dje, loke ta haci cu e ta prefera di wanta cierto cantidad di abuso, y di incumplimento cu reglanan, pa e no haya su mes mañan cu problema, no necesariamente cu su trabao, pero cu su entrada, pasobra hopi biaha e tipo di cosnan ey ta hiba bo cu mañan nan ta kita bo for di trabao, anto e ora ey bo ta keda sin entrada y preocupa con bo ta bay cria bo famia, etc. “Kiermen, e drempel ey ta bin facilmente, na momento cu e cosnan aki ta sosode.
Y mi ta kere cu tin diferente manera pa aborda esaki; bo tin e parti di afilia bo mes sindicalmente. Manera ta conoci FTA, na cuminzamento di aña, a inicia cu un proyecto nobo unda cu di banda di esnan cu ta sindicaliza, hende por afilia su mes a base individual tambe, den cual caso e proceso ta bay completamente anonimo, pues e doño di trabao, en principio, lo no sa cu bo ta afilia sindicalmente, y e ora ey na cualkier momento cu e trahador tin problema, e ta acerca FTA y por haya asesoria di nos huristanan, y si ta necesario nos por interveni pa e trahado sea direct of indirectamente, depende con e kier tackle e problema.
Pero, esey no ta kita afo cu ainda, kizas door cu e trahado no sa esey, of ainda e no ta kita e miedo totalmente, uso optimal no ta wordo haci di e posibilidad” Figaroa a señala, y a duna di conoce cu tin un cantidad di persona cu a afilia na e forma aki. “Nos no por bisa cu no a surti efecto, pero tin hopi espacio pa hopi trahado cu no ta afilia den grupo, of por medio di un contrato colectivo, por afilia indirectamente”, Hose Figaroa a remarca.
