ORANJESTAD (AAN): Recientemente UNESCO-Aruba hunto cu Club di Movimiento a organiza un tayer pa persona y organizacionnan cu ta traha riba tereno di cultura.
E training aki a tuma luga na oficina di ATHA y en total a participa 35 persona.
Ruby Eckmeyer, kende ta e specialista pa e programa di cultura na secretariado di Comision Nacional pa UNESCO di Aruba, a presenta e training. A usa e formulario di aplicacion di UNOCA como e base pa e participantenan por describi un proyecto.
E tabata un training interactivo, den cua e participantenan por a traha riba un proyecto pa cua nan tin mester di fondo y hunto por a evalua e contenido di e aplicacionnan cu e participantenan a traha. Reaccion di e participantenan tabata hopi positivo y hopi idea di colaboracion a bini dilanti. Entre otro e importancia a continua cu mas training y intercambio di informacion y di trabao ta algo cu mayoria tabata di mesun opinion.
Den cuadro di e programa ‘Culture and Arts Education’ di UNESCO por spera den futuro mas riba tereno di educacion cultural na Aruba den colaboracion cu e diferente instancia y organizacionnan. Esaki tabata e prome salida di UNESCO trahando hunto cu Club di Movimiento su directora Samanta Westera-Juppa y su asistentenan Ferdinand Franca y Emily Krosendijk. Tambe a haya e cooperacion di ATHA y di Vanessa Croes, líder di e proyecto Poder di Hubentud pa por a realisa e training aki. Intencion ta pa comienso di otro aña, sigui organiza mas training riba tereno di cultura pa contribui na desaroyo di e area di cultura na Aruba.
