ORANJESTAD (AAN): Dialuna mainta, Minister Ursell Arends a yama un rueda di prensa, hunto cu funcionarionan di Bureau City Inspector,
unda el a bisa cu Aruba no por warda mas pa loke ta introduccion di un maneho di desperdicio responsabel y pa e ciere di e dump na Parkietenbos.
E mandatario a indica cu tin un necesidad mas impulsa solucionnan y mientrastanto ta buscando pa mehora tur e procesonan di desperdicio y tambe algun proceso nobo na caminda.
Mester traha pa evita daño na e salud di pueblo y tambe na naturalesa pero mas cu tur cos pa preveni cualkier daño permanente na e producto turistico.
Segun Minister Arends, lo tin espacio pa e mehoracion den e periodo benidero, pero no tin espacio pa warda mas. Durante e proceso di redireccion di taira, a tuma nota cu lo tin resistencia pa e cambionan cu ta introduciendo.
Ta premira cu lo bin dumpnan ilegal y cu tairanan lo wordo tira den naturalesa. Tambe ta premira cu lo tin actonan di protesta caminda cu ta bay asina leu y ta envolvi material of daño na naturalesa, a indica.
Sinembargo tin hendenan den comunidad cu kier contribui cu e cambio y ta dispuesto pa yuda cu control y stimula un comportacion responsabel, a agrega.
Minister Arends a splica cu pa e grupo aki ta introduci 'FIXI APP'. "Nos lo sigui educa pueblo y stimula educacion via scolnan pa asina aki nos futuro generacion ta prepara pa mehora nos esfuersonan pa draai un isla sostenibel y limpi".
E lucha aki no ta di gobierno solamente, a remarca.
El a bisa cu nan ta contento cu e colaboracion di e partnernan, cu a traha riba e adaptacion di e APP, mirando cu ya caba nan tin un trayectoria cu e gobierno di Aruba cu ta duna e siguransa riba e calidad di e aplicacion aki, pero tambe ta duna e siguransa di e continuidad di e aplicacion.
E aplicacion ta empodera e ciudadano cu mira algo cu ta robes pa raporta esaki y cu tin e confiansa tambe cu e raportahe aki lo yega na e instancia gubernamental concerni, Minister Ursell Arends a expresa.
