Uncle Louis Store a gana e premio di publico ‘Erfgoed Duurzaamheidsprijs 2023’

ORANJESTAD (AAN):  Dia 28 di september Stichting Monumentenfonds Aruba a ricibi e grato noticia cu Uncle Louis Store a gana e premio di publico di ‘Erfgoed Duurzaamheidsprijs 2023’ otorga pa Rijksdienst voor het Cultureel Erfgoed hunto cu Nationaal Restauratiefonds y Nederland Monumentenland.

            E ganadornan na Hulanda  a ricibi nan premio for di staatssecretaris Gunay Uslu. E monumento na Den Bosch Tuighuis a gana den e categoría ‘zakelijk’ y e monumento na Culemborg cu tabata cas di Huub van Oorschot a gana e premio  den categoría di ‘particulier’.

            E proyecto di Uncle Louis Store ta e unico Monumento pafor di Hulanda cu a participa hunto cu cuarentidos otro monumento y danki na e publico cu a vota activamente nos a logra bay cu e premio di publico.

            Esaki ta bira ya e di dos premio cu Stichting Monumentenfonds Aruba ta ricibi pa e edificio di Uncle Louis Store. Na 2022 a ricibi e Pieter van Vollenhovenprijs cu ta un ‘herbestemmingsprijs’ y awor e aña aki ta obtene un Erfgoed Duurzaamheidsprijs di publico.

            Uncle Louis Store, un monumento construi na 1951, ta actualmente e monumento mas sostenibel di Aruba. Diferente medida di sostenibilidad a keda aplica na e monumento. Pa cuminsa reuza un edificio caba ta un medida sostenibel.

            Banda di esaki durante restauracion a descubri e tegelnan original pa cual a uza esakinan mes bek. A instala panelnan solar pa fría e edificio mecanicamente. Tambe ta recoge e awa di e condensacian di e sistema mecanico y reuza esaki pa flush e toiletnan actualmente y muha e matanan di e hardin pafor den futuro.

            Full e edificio tin luznan LED y na e bentanana original di jaloezie di palo a pone glas dobbel parti paden pa por wanta e temperatura abou paden di e edificio. Na e parti paden di e bentananan tin panelnan di plastic recicla como isolacion y pa crea mas privacidad.

            Pa locual ta trata sostenibilidad social a laga artistanan haci uzo di e edificio aki den centro di San Nicolas durante cu esaki tabata bashi, prome cu e restauracion. Ainda por mira partinan den e edificio cu a keda como recordatorio di e periodo aki.

            A haci e edificio accesibel pa personanan minusvalido cu enfasis riba personanan visualmente incapacita. E interior a ser crea den un concepto di ‘open office’ pa crea mas espacio y stimula e contacto y cooperacion entre e empleadonan di Directie Natuur en Milieu.

            E proyecto aki sigur a conoce su retonan mirando cu lamentablemente Aruba ta cana atras pa locual ta trata medidanan di sostenibilidad specialmente riba terreno di monumentonan. Materialnan hopi biaha ta mas caro y mas dificil pa haya. Pa e restauracion a sigui e richtlijnen di restauracion di Aruba cual den contraste cu Hulanda ta un poco mas estricto den locual ta of no ta permiti. Tur esaki ta trece cune cu mester ta hopi creativo na momento cu ta trata di un restauracion pa por haci esaki na un manera sostenibel.

            Stichting Monumentenfonds Aruba sigur ta hopi orguyoso di e resultado di e proyecto di Uncle Louis Store cual ta forma tambe un ehempel pa otro proyectonan manera Steenweg 19 y pronto Cas Veneranda.

            SMFA ta hopi orguyoso di e logronan aki pa Aruba y ta gradeci un y tur cu a forma parti di e proyecto aki: Directie Natuur en Milieu, Archiosa N.V., Van Kessel Havenbouw N.V., RBC Royal Bank (Aruba),  FAVI, Ateliers 89,  familiarnan  di Uncle Louis y famia Nisbet,  e team di SMFA y e comunidad di Aruba cu a vota y demostra con orguyoso nos ta di nos monumentonan.