Estadisticanan durante luna di september 2023
*A nace un total di 81 baby
ORANJESTAD (AAN): Desde luna di mei 2023 cu enfoke riba transparencia y alabes pa duna claridad na nos clientenan, pashentnan y bishitantenan Horacio Oduber Hospital ta publica mensualmente diferente cifra pa duna un indicacion di loke ta sosode na nos Hospital pa loke ta cuido, diagnostico y tambe donacion di sanger.
Durante luna di september 2023 a hospitalisa 786 pashent di cual 55% tabata hende muhe y 45% tabata hende homber. Di e 786 pashent un total di 464 pashent a drenta cu emergencia, 199 pashent tabata admision planea y 123 tabata pashent via policlinica admiti cu emergencia. Cada pashent cu a hospeda den Hospital a keda un promedio di 4,2 dia y durante luna di september e ocupacion di cama tabata na 87%.
Un total di 622 operacion a tuma luga na september cu ta 55 operacion mas cu na augustus. A nace un total di 81 baby (39 mucha homber y 42 mucha muhe) na september. Tambe na september nos heroenan a pasa Bloedbank y a haci un total di 214 donacion di sanger.
Departamento di Emergencia a mira na september un total di 2.640 pashent cu ta 48 pashent mas cu luna pasa. Di e total bishitante na departamento di emergencia 1.139 pashent no tabata caso di emergencia.
Specialistanan den servicio di HOH a haci un total di 6.441 consulta cu pashent na e diferente policlinicanan. Departamento di Radiologia a haci un total di 4.817 test manera CT scan, MRI y mas. Un total di 11.148 persona a bay departamento di LABHOH pa haci nan test y total di 767 pashent a sali for di Hospital.
Cifra ta duna claridad y Hospital ta spera cu di e forma aki por brinda transparencia kico tur ta pasa mensualmente na HOH.
