Minister Tjon satisfecho cu sentencia di hues:
ORANJESTAD (AAN): Diaranson hues a dicta sentencia den e caso cu mi a lanta contra Patrick Paskel y Nelson “Speed” Andrade pa loke ta rectificacion di nan ponencianan contra mi persona cu mi lo tawata un sospechoso na mas cu un ocasion y cu mi a wordo deteni door di Landsrecherche den un caso specifico tempo cu mi tawata eherce mi funcion den Cuerpo Policial.
Nos a presenta tur prueba na hues, incluso un declaracion di Ministerio Publico, pa mustra cu esaki tawata un mentira flagrante di parti di e periodistanan Andrade y Paskel. Y awe hues a duna nos razon. Hues a dicta cu bo no por sin mas gaña riba un persona, y e periodistanan mester rectifica.
Mi a entama e caso aki no pa mi mes, pasobra mi mes por publica tur cos den prensa y demostra cu nan a gaña. Pero mi ta pensa cu e no ta na bienestar di nos comunidad pa personanan simplementa gaña riba un otro persona, y apesar cu bo ta mustra cu esaki no ta berdad, nan ta sigui cu esaki. Mi ta kere esaki ta un desaroyo preocupante y cu ta crea hopi segregacion den nos comunidad y pa e motibo ey mi a entama e caso”.
Nos a demostra cu e periodistanan a gaña y hues tambe ta di opinion cu e periodistanan a pasa e limite di locual ta legalmente permisibel y cu nan actonan ta causa daño na mi honor, bon nomber y integridad, no solamente den capacidad priva pero tambe como minister.
Ambos Paskel y Andrade mester rectifica y si nan no haci esaki, nan mester paga 5000 florin pa cada dia cu nan keda sin rectifica. Ademas nan a wordo condena den e gastonan di e procedura.
