Iglesianan Cristian di Aruba ta comenta:
ORANJESTAD (AAN): Recientemente Iglesianan Cristian di Aruba (ICA) a haya e oportunidad pa presenta nan punto bista na Comision Fiho di Parlamento pa Asuntonan di Famia y Anciano riba e proposicion di ley di matrimonio di mesun sexo.
Aki a señala cu Corte Europeo pa Derecho Humano a duna sentencia caba pa loke ta trata si matrimonio pa hendenan di mesun sexo ta un asunto di derechonan igual.
E veredicto ta cu matrimonio ta entre un homber y un muhe. Sinembargo, basa riba cambio di pensamento den algun pais miembro Corte Europeo a dicta cu lo ta bon pa haci parehanan di mesun sexo un fabor door di ofrece nan un alternativa manera union civil.
Aruba su codigo civil cu ta declara cu matrimonio ta entre un homber y un muhe. Esaki no ta viola Aruba su constitucion tampoco e no ta viola e ley mas halto cu ta Tratado Europeo pa Derecho Humano.
Tur hende ta di acuerdo cu den casonan igual mester tin derechonan igual pero conforme Corte Europeo pa Derecho Humano e union entre parehanan di mesun sexo no ta igual na un matrimonio entre un homber y un muhe. Esaki ta e decision final di e corte aki.
Casacion
Proximamente Land Aruba lo topa Fundacion Orguyo den Corte di Casacion na Hulanda. Ta di spera cu abogado di Land Aruba lo sa di mustra e Corte di Casacion na unda Corte di Apelacion a comete erornan grave den nan sentencia. Aruba a cumpli cu loke Corte Europeo pa Derecho Humano ta exigi relaciona cu parehanan di mesun sexo.
Aruba no ta discrimina parehanan di mesun sexo. Ta Corte di Apelacion a surpasa su autoridad door di sinta riba stoel di legislatura y impone matrimonio di mesun sexo riba pueblo di Aruba mientras cu Aruba ya caba a cumpli cu e veredicto di Corte Europeo pa Derecho Humano.
