Un total di 58 representante di 16 pais a ricibi informacion valioso durante e Global Travel Conference

ORANJESTAD (AAN):  Diamars mainta a tuma lugar e asina yama Global Travel Conference, organiza pa Aruba Tourism Authority.

Dialuna a anochi a haci e apertura oficial dunando un bon bini na e partnernan local y partnernan internacional cu ta consisti di representantenan di 16 pais.

Minister di Turismo Dangui Oduber den su discurso a bisa cu ta bunita pa ricibi 58 representante di 16 pais, di cual cada un tin su perspectiva y experticio unico den turismo.

E mandatario a elogio e partnernan local pa nan esfuerzonan durante henter aña, pa sigui mantene turismo di Aruba na un nivel halto.

Oduber a indica cu un di e metanan principal di e Global Travel Conference ta pa e partnernan internacional keda cu lasonan duradero cu nos isla.

Diamars a tuma lugar e conferencia oficial, unda cu e invitadonan di Merca, Canada, Latino America y Europa a haya diferente presentacion di e producto Aruba.

Un parti importante di e conferencia tabata pa mustra na e invitadonan e vision, maneho, historia y cultura di Aruba.

Cada turista ta bishita un destinacion pa un diferente motibo y pesey ta importante pa demostra e potencial turista kico tur Aruba tin di ofrece.

Aruba ta un destinacion popular, pero semper mester sigui traha duro pa mantene esaki na un bon nivel y pa purba atrae mas turista di destinacionnan existente y purba atrae mas for di lugarnan cu quizas no ta bishita nos isla asina hopi.

Tur esnan envolvi den e evento a keda hopi satisfecho cu e manera con Aruba Tourism Authority a organiza e conferencia importante aki.