Presidente Edgard Vrolijk: Awe tin reunion publico
ORANJESTAD (AAN): Presidente di Parlamento, Edgard Vrolijk a declara den entrevista cu DIARIO cu awe diaranson Parlamento lo tin un reunion publico pa fiha e comision y despues nan lo monitorea loke ta e asunto cu Hulanda.
Vrolijk a expresa cu nan lo percura pa Prome Minister na momento cu tin mas informacion, bay Parlamento pasobra nan ta keda al tanto di e movecionnan aki. Ta cerca di 10 di October y tin decisionnan cu mester tuma y tin biaha no ta e decisionnan mas facil, pero di interes general.
El a agrega cu mester duna espacio na Prome Minister pa e sigui negocia trankilamente. El a demostra esey den e ultimo añanan cu diferente asunto cu el a atende cu ne na un manera profesional.
Manera cu e RAFT ta aworaki Aruba no ta sali beneficia, a subraya. Mester bin modificacionnan y cu ta traha di datonan di Pais Aruba cu ta bay duna temporariamente na Reino y esey ta exigi un drempel mas halto di negociacion, a expresa.
Seguramente e prioridad ta aworaki pa termina e ciclo di presupuesto y ta spera cu pa fin di november por ta cla cu esey. Ta wardando presupuesto supletorio drenta. Te ainda tin un ley mas pendiente cu ta e AWB pa asina parlamento por termina esey tambe. Na e momentonan cu otronan drenta, si eseynan tin prioridad. Pero aworaki tin prioridad riba e Presupuesto y riba e Presupuesto Supletorio.
