Presidente di SMAC, Rusette Croes:
ORANJESTAD (AAN): Desde su instalacion na september ultimo, e directiva di Stichting Maneho di Aruba su Carnaval (SMAC) ta trahando intensamente riba e preparacionnan pa e di 73 edicion di Carnaval, e fiesta cultural mas grandi di Aruba. E diferente comisionnan a wordo forma y ta actualmente trahando riba nan respectivo area pa brinda Aruba un Carnaval bon organiza.
Presidente di SMAC, señora Rusette Croes, a informa cu e prome actividadnan di Carnaval 2027 lo cuminsa caba den luna di november. Entre esakinan tin e eleccionnan di Prins y Pancho den tur cuatro categoria, Tumba Contest Infantil y Hubenil, y Calypso y Road March Contest Infantil y Hubenil. Segun Croes, manera cu aña bolter, lo SMAC lo sali mas duro cu nunca.
Tocante e permisopnan necesario, Croes a indica cu e peticionnan a wordo entrega caba na Gobierno. E ta spera di ricibi esakinan dentro di poco, pa asina sigui cu e preparacionnan di Carnaval.
Sinembargo, señora Croes a menciona cu e reto di mas grandi e aña aki ta e aspecto financiero, retonan di dificultad pa haya sponsorship pa motibo specificamente door di cambio di proceduranan cu a bira tiki mas largo. Esaki ta crea incertidumbre den e planificacion di e presupuesto, ya cu ainda no ta cla cu cuanto fondo SMAC lo por conta y cua actividadnan por wordo realisa cu e recursonan disponibel.
A pesar di e retonan aki, Croes a expresa confianza cu Carnaval 73 lo ta grandi y bunita. El a destaca cu e paradanan di mucha ta sigui crece, mientras cu e interes den e paradanan grandi tambe ta fuerte, cu 10 grupo inscribi caba.
E prome parada oficial di Carnaval 2027 lo ta Fakkel, programa pa diasabra 9 di januari. Croes a invita e pueblo di Aruba pa sigui e canalnan oficial di SMAC riba social media, y consulta su website pa keda na altura di e programa y tur actividad di Carnaval 73.
Cu e preparacionnan den pleno desaroyo, SMAC ta sigui traha pa mantene e tradicion di Carnaval bibo y brinda e comunidad un celebracion cu ta refleha e creatividad, cultura y entusiasmo di Aruba. “Carnaval t’ey pa keda”, Croes a conclui.
