ORANJESTAD (AAN) – E hecho cu e cantidad di casonan di Covid-19 a bolbe subi Diamars, cu a aumenta di 8 pa 33 y Diaranzon, aunke a keda registra 17 caso, toch ta 50 caso den dos dia, y esaki ta trece preocupacion y frustracion cerca esnan conciente di e situacion, den nos comunidad.
Na Santa Cruz, dos siman pasa (den fin di siman), un famia a tene un fiesta grandi, cu bebemento, boroto, y pa 2 or di madruga ainda e demas bisiñanan no por a pega soño.
Segun un di e bisiñanan a comenta na mesa di redaccion di DIARIO, nan no a yama polis pasobra esaki no ta e prome biaha cu e mesun famia ta haci esaki, incluso cu tabata tin covid-19 cerca un par di hende den e famia, y aparentemente, polis a cansa di bin hala nan atencion, y ultimamente nan no ta bin mes, para e fiesta.
Y ta secreto publico cu atrobe tin bebemento formal den barnan, cu bringamento, y cu den fin di siman ta hala di hoben ta cana riba caminda den grupo, entre otro den Paseo Herencia, y sin bisti tapaboca.
Ta parce cu un parti di nos comunidad no ta conciente cu covid-19 tey ainda, y cu si nos pueblo no ta uni cabes sea aumentando e cantidad di hendenan vacuna, of alomenos comportando segun protocol di DVG, lo por surgi un ola mas fuerte, si tene cuenta cu December ta djis na un paso, cu tin intencion tambe pa organiza carnaval 2022 (aunke ainda no a wordo bisa oficialmente), y cu fiesta ta sigui aki aya.
Ta comunidad mes y nos propio capacidad pa cuida di otro, tanto den famia como pafo di famia, esey so por scapa Aruba di un otro ola, di mas hende na hospital, di mas hende den UCI tanto na Aruba como esnan transporta pa Colombia, y mas tristo ainda di mas morto.
Ban uni cabes cu un solo pensamento. Ban deroca e virus Covid-19 cu nos mes boluntad, nos mes forza y claro cu hopi FE den Dios si nos comporta manera mester ta.
