ORANJESTAD (AAN): Prome Minister Evelyn Wever-Croes tabata presente na e tercer conferencia di “German-Caribbean Energy Conference”.
Den e conferencia virtual aki a trata metanan di desaroyo sostenibel den Caribe y tambe con paisnan chikito por haci miho uzo di conocemento y recursonan di Paisnan mas grandi.
Durante di e conferencia Premier Wever-Croes a splica cu pa Gobierno di Aruba yega e metanan di energia y clima, a tuma e iniciativa pa trece stakeholders hunto y basa riba vision comun, esaki a resulta den un maneho titula: “National Energy Policy”. E vision tras di e maneho ta pa percura pa ciudadanonan Arubano, companianan y bishitantenan tin acceso na energia limpi, confiabel y pagabel.
Segun Prome Minister, den region Caribense mas y mas paisnan ta bayendo den direccion di menos consumo di “carbon energy”. Como isla chikito den desaroyo / “Small Island Development States” (SIDS), pa logra yega e metanan aki mas lihe, e ta importante pa considera e rikesa y conocemento cu nacionnan mas grandi tin pa ofrece. Cooperacion strategico ta e clave pa ta exitoso den e transicion na un futuro mas resiliente. Pa e motibo ey, Prome Minister a expresa: “mi ta sumamente contento cu e compromiso di Alemania ta parti di innovacion den Caribe”.
Durante di e conferencia esnan presente a siña di solucionnan di Alemania cu ta dirigi na aumenta sostenibilidad den Caribe. Den e caso di Aruba specificamente, sostenibilidad ta significa cu pa inverti y atrae inversionnan den sector di energia no kiermen solamente diversificacion di economia y crecemento economico. Sino, cu e ta esencial pa realisa un economia inclusivo y resiliente a termino largo cu ta resisti impacto di factornan externo.
“Ningun pais ta immune pa factornan externo manera cambio di clima y pandemia. Pero cu e maneho nacional di energia, reformanan structural y ambicion pa transformacion digital, ta forma e base pa crea oportunidadnan economico nobo. E oportunidadnan aki a termino largo tin e meta pa diversifica e economia y mitiga e riesgonan di cambio di clima”, Prome Minster a enfatisa.
Prome Minister a termina bisando: “E momento pa tuma accion ta awo y nos ta kere cu door di traha den bon cooperacion, lo yuda e region acelera e metanan di energia renobabel’.
{gallery}E maneho nacional di energia, reformanan structural y transformacion digital ta forma e base pa crea oportunidadnan economico nobo{/gallery}
