XIX DIADOMINGO DEN AÑA 8 di augustus 2021 nr. 323
I lect: 1Rey 19, 4-8
Salmo: 34
II lect: Ef 4, 30-5 ,2
Evangelio: Hn 6, 41-51
Den e tempo aya e pueblo a cuminsa murmura contra Hesus, pasobra El a bisa: “Ami ta e pan cu a baha for di shelo!” P’esey nan tabata comenta: “Ma no ta Hesus, yiu di Hose, esey? Nos no conoce su mama y su tata? Pakico e ta pretende anto cu el a baha for di shelo?” Hesus a contesta nan: “Basta murmura entre boso. Ningun hende no por bini cerca Mi, si mi Tata cu a manda Mi no hal’e cerca Mi; anto Ami lo lant’e for di morto riba e ultimo dia. Ta skirbi den buki di e profetanan: ’Dios lo siña tur hende.’ Tur cu a scucha Tata y siña di djE ta bini cerca Mi. No cu ningun hende a yega di mira Tata; ta solamente Esun cu ta bini di Dios a mira Tata. Mi ta sigura boso: esun cu kere, tin bida eterno. Ami ta e pan cu ta duna bida! Boso antepasadonan a come mana den desierto y nan a muri! Ma esaki ta e pan cu ta baha for di shelo; si un hende come di dje, e no ta muri. Ami ta e pan bibo cu a baha for di shelo. Si un hende come e pan, e ta biba pa semper. E pan cu Ami lo duna ta mi mes carni, cu Mi ta duna pa mundo haya bida!”
Palabra di Señor.
MENSAHE
Un leyenda riba amor ta bisa: “Amor a bisti su mes den curpa humano pa conkista curasonnan di hende, pero hende a reconoc’e y a clab’e riba cruz. E ora ey amor a disfrasa su mes den alimento. A converti su mes den pan y tabata warda. Ora hende a haya hamber, a come e pan y di e manera aki amor por a regresa su mes cas cu ta e curason di hende.”
E leyenda aki ta mustra con Dios den su gran amor pa ser humano ta inventa diferente forma pa bolbe cerca hende a pesar cu esun tabata rechas’e un biaha tras di otro.
Pa Dios e infieldad di hende tabata un motivacion pa crea otro formanan pa bolbe cerca dje. Apesar cu hende a herida curason amante di Dios, Dios no a keda rabia, no a castiga hende, sino a bira pan pa keda cu hende.
- E pan aki tin caracteristicanan masha particular. E ta un pan celestial – un pan cu a baha fo’i shelo. E ta diferente di cualkier otro pan cu hende por traha riba tera. E ta un pan traha riba e fermento (yeast) di Spirito Santo. Dios Tata ta su creador y autor.
- E ta pan di bida. Esun cu ta come e pan aki ta drenta den comunion cu Dios. P’esey tambe e comemento di e pan di eucaristia nos ta yam’e: ‘Santa Comunion’.
Rumannan! Siguiendo e reflexion aki ban purba contesta riba e siguiente pregunta: Mi amor ta suficiente creativo pa yega curason di mi prohimo?
Pa nos, e actitud di Dios mester ta un motivacion pa no keda ofendi cu fayonan di otro hende, pa no desanima pa motibo di heridanan causa pa desamor, sino sigui inventa maneranan nobo pa drenta den curason di nos prohimo.
Santa Comunion, cu nos ta ricibi bou di cada Eucaristia, mester ta un motivacion y compromiso pa biba den comunion cu otro y comparti den ambiente di amor. Cada comunion, cu ta expresion di Dios su amor, mester alimenta nos amor y yuda nos biba den comunion cu Dios y comunion cu otro.
ORACION
Señor, kita fo’i mi curason tur rabia y rencor y yen’e cu Bo amor.
PROPOSITO
Sea mas creativo den trato ‘amoroso’ cu bo prohimo.
