ORANJESTAD (AN): Rotary Club Aruba ta sumamente agradecido na e acohida y sosten grandi cu a ricibi tur e cuater diadomingonan na e “Rotary Container Sales” 2021 cu a tuma lugar na Club Kibrahacha 60+.
Cu cada compra, E bishitante y fiel clientenan a aporta na un bon causa den nos comunidad. Ta hopi satisfecho cu e resultado di e evento.
E “Container Sales” tabata un actividad temporal cu a logra su meta. E directiva y miembronan di Rotary Club Aruba awor aki ta den pleno preparacion pa por organisa un posibel “Fiesta Rotaria 2022”, den e manera cu pueblo di Aruba conoce.
En conexion cu esaki, y a pesar di e peticionan pa ripiti e "Rotary Container Sales", ta lamenta cu esaki no lo ta posibel pa awor. Ta gradici boso pa e comprension pa cu esaki y ta spera di por ricibi boso na "Fiesta Rotaria 2022" un biaha mas den e ambiente di custumber.
Sigui bishita e Facebook Page 'Fiesta Rotaria Aruba' pa asina keda na altura di e preparacion nan pa “Fiesta Rotaria 2022”.
President Frederick Nuboer kier a duna un danki na tur esnan cu a bishita nan y contribui na comunidad di Aruba. Un gradicimento na tur compania cu a sa di haci un donacion di tur e productonan cu por a wordo bendi.
Un danki na tur miembronan di Rotary Club Aruba, Rotaract Club Aruba, Interact Club Aruba y Interact Club Colegio Arubano. Tur boluntarionan un danki pa boso ayudo. Y un danki special na Club Kibrahacha 60+.
https://diario.aw/categories/noticia/general/rotary-container-sales-tabata-un-evento-exitoso#sigProId31670ecc83
