Diescuatro aspirante a inicia cu Basisopleiding Penitentiair Inrichtingswerker

Minister Dowers:

ORANJESTAD (AAN): Dialuna mainta Minister di Husticia, Integracion, Transporte Publico y Energia, mr. drs. Arthur Dowers, ta expresa su satisfaccion cu e seleccion di 14 candidato cu a logra cumpli cu e rekisitonan pa inicia e Basisopleiding Penitentiair Inrichtingswerker. E formacion aki ta representa un paso importante den e esfuersonan di Gobierno pa fortalece e capacidad di personal di Korrektie Instituut Aruba (KIA) y contribui na un sistema penitenciario mas sigur y profesional.

Di casi 50 persona cu a aplica pa e formacion, 14 a logra pasa e proceso di seleccion, cu a inicia na april di e aña aki. Segun Minister Dowers, e resultado ta demostra e interes cu tin entre nos hobennan pa contribui na siguridad y husticia na Aruba.

Minister Dowers ta enfatisa cu e funcion di un trahado di prizon ta uno cu ta exigi disciplina, integridad, responsabilidad y preparacion profesional. E futuro trahadonan lo tin cu opera den un ambiente no facil, caminda nan no solamente tin e responsabilidad pa mantene orden y siguridad, sino tambe pa contribui na un trato humano y profesional di personanan cu a perde nan libertad.

14 candidato a logra pasa e proceso di seleccion. Nan ta prepara nan mes pa asumi un responsabilidad grandi den nos cadena di husticia. Trabao den un prizon no ta facil. E ta exigi fortalesa mental, disciplina y capacidad pa actua profesionalmente, hasta den situacionnan dificil.

Un di e cosnan mas importante, segun Minister Dowers, ta e integridad di cada aspirante, con nan ta funciona den e instituto manera KIA. "E tentacion ta bay ta hopi grandi, y bosonan ta hopi jong, pero fact ta keda cu bo ta bay topa cu hendenan cu tin hopi experencia y cu ta campeon den manipula hende, y sin cu bo sa, bo por cay den nan gara".Esey ta algo cu cada aspirante mester ta consciente di dje for di momento cu drenta e opleiding.

KIA actualmente ta enfrenta retonan significativo, tanto den su infrastructura como den disponibilidad di personal. E cantidad limita di trahadonan ta crea presion adicional riba e funcionamiento diario di e institucion. P'esey ta importante pa continuamente percura pa klasnan nobo pa formacion di personal nobo pa KIA.

Na final, minister Dowers a gradici e ekipo cu ta encarga cu formacion di e hobennan aki y alabes a desea e aspirantenan nobo tur clase di exito den e reto nobo y importante aki.