Un pomp nobo recien instala a faya y ocasiona candela na WEB

A pidi Wärtsilä pa traha riba ‘Recovery Plan’

• Motor RECIP #7 lo keda offline pa como seis luna
• Suministro di Coriente ta keda delicado proximo lunanan 

ORANJESTAD (AAN): Riba Diaranson mainta caba, WEB Aruba NV a emiti un boletin oficial pa splica cu loke a socede den e planta cu Motornan RECIP, ta un fayo di un pomp di presion halto pa combustibel, cu ta poni na un cilinder di e motor.  Esaki a ocasiona un lek di combustibel, y ocasiona e candela.

   Manera cu DIARIO a trece dilanti caba, riba Diamars 16 di April 2024 atardi a surgi un candela den motor RECIP #7 den planta di energia di WEB Aruba NV na Balashi.  E bon noticia ta cu ningun persona a resulta herida.

   E compania di energia ta calmando pueblo cu te ainda e situacion di produccion di coriente ta bao di control, pero ainda delicado.

   Reaccion durante candela: Segun e compania, asina cu e candela a wordo detecta door di personal di warda y di mantenimento, inmediatamente a bati alarma.

   Riba tereno di e planta mes tin un asina yama ‘WEB Emergency Team”, conoci como ‘WET Team’.  Nan a acudi mesora na e planta di RECIP pa brinda e prome asistencia. Na mes momento a yama Brandweer cu a yega na Balashi cu basta rapidez.

   Segun WEB Aruba NV, e candela lo tabata dificil pa preveni, door cu tabata un fayo repentino di e pomp di combustibel di presion halto cu a worde cambia algun dia atras pa un pomp cu a bin nobo di fabrica.

   Enberdad awor esnan na WEB a pidi un team di fabricante Wärtsilä di Finlandia, pa haci un evaluacion di e daño y pa traha riba un asina yama “recovery plan”.

   Menos coriente awor: Hecho ta cu pa awor, Motor RECIP #7 lo ta for di servicio y ta calcula cu lo tuma mas o menos 6 luna pa e ta back den operacion.

   WEB Aruba NV ta confirma cu e suministro di coriente actual ta delicado caba door di e aumento enorme di demanda pa coriente cual a subi considerablemente e ultimo aña.  Ademas Aruba ta drentando ‘temporada di calor’ y e periodo di piek di uzo di coriente ta yegando.

   Esey nifica cu e situacion por bira critico.  Gerencia ta splicando cu e team di WEB Aruba ta haci su maximo esfuerzo pa maneha e produccion y suministro di coriente lo mihor posibel, pa asina por satisface e demanda di comunidad pa coriente.

  Gerencia di WEB ta manda un palabra grandi di gradicimento pa tur empleado cu a haci nan maximo esfuerso pa maneha e candela asina rapido. Tambe un palabra di danki ta bay pa Brandweer Aruba.

   E potretnan aki ta pa cortesia di WEB Aruba NV.