Ministro Maduro a reuni cu diferente banco internacional na Washington

Durante IMF Spring Meetings...

ORANJESTAD (AAN): Den e siman aki cu Minister Maduro di Finansa ta atende e IMF Spring Meetings na Washington DC, e mandatario ta probecha pa reuni cu diferente banco pa por haci e preparacionnan necesario pa Aruba por subi mercado internacional pa por cubri e necesidad financiero di Aruba.

   Minister Maduro a reuni cu, entre otro, JP Morgan, Standard Charter, Citi Group y Santander pa asina por splica mas di e desaroyonan cu ta tumando luga na Aruba pa yega na e stabilidad financiero cu ta brinda e confianza na inversionista.

   E aña aki Aruba lo bay subi e mercado di capital internacional despues di e pandemia y lo haci esaki pa un suma di 160 miyon Dollar. Esaki ta un suma cu ta worde refinancia di e debenan internacional existente cu ta madura. Como ta refinancia, esaki no lo crece e debe di Pais Aruba.

   Mester acentua cu inversionistanan tin confianza den Aruba y esaki nan por a mira durante e pandemia, na unda cu inversionistanan a keda tene Aruba su bononan apesar di e situacion precario di Aruba su finansa y economia na e momento eynan. Tur e banconan ta indica di ta hopi satisfecho pa mira e manera Aruba a atende cu e pandemia y awo ta recuperando grandemente. Despues di hopi tempo Aruba, awo ta conoce surplus en bes di deficit y esaki ta trece cune otro oportunidadnan financiero pa Aruba.