ORANJESTAD (AAN): Generalmente personanan ta feliz ora cu nan ta haci cosnan cu nan gusta,
pasobra e sensacion di e bienestar ta crece mas ora cu bo tin tempo liber, pero esey ta yega te na cierto punto. Esey ta segun un recien estudio publica den Journal of Personality and Social Psychology. Aunke cu scarcedad di tempo liber ta nada saludable, si bo tin’e den abundancia tampoco lo ta beneficioso, segun e autornan di e estudio.
Den nan estudio, e investigadornan no a precisa cual ta e number optimal di tempo liber pa dia, y toch nan a yega na un cifra di entre 2 y 5 ora.
Basando nan mes riba e datonan di estadistica cu nan a haya di 35.375 Mericano cu nan a entrevista y tambe di dos test cu nan a haci, e cientificonan a descubri cu e personanan cu tabatin menos di dos ora liber tur dia, tin hopi stress debi na nan agenda hopi preta. Y esnan cu tin mas di cinco ora di tempo liber pa dia, tampoco no a presenta e nivelnan mas halto di bienestar.
Marissa Sharif, kende ta Marketing Professor di Wharton Business School di University of Pennsylvania na Merca, y cu ta investigador principal di e articulo, a splica cu si bo tin hopi tempo liber, ta haci hende mas feliz, compara si bo tin poco tempo, pasobra esey ta kita e stress debi na falta di tempo.
Sinembargo, kizas lo mas importante ta cu un cantidad modera di tempo liber ta pone hende sinti nan mes mihor of mas feliz, compara cu ora nan tin un gran cantidad di tempo liber. Y esey ta bin debi cu un cantidad grandi di tempo liber, hende ta cuminza nota e falta di productividad y meta, segun Sharif a indica.
“Humanonan no gusta di ta vago,” segun Cassie Mogilner Holmes, kende ta Marketing Professor di UCLA Anderson School of Management na Los Angeles.
No obstante, ora cu esnan cu a wordo entrevista cu ta goza di hopi tempo liber pa pasa esaki cu otro hende, of ta sinti cu nan ta probechando di un manera productiva, nan no ta mira nan mes afecta pa e abundancia di oranan liber.
