ORANJESTAD (AAN): Diahuebs mainta gerencia di De Palm Tours y representantenan di FTA a firma e prome acuerdo colectivo pa trahadonan den nan departamento di bus.
E grupo di companianan di De Palm ta emplea 360 asociado a traves di nan diferente entidadnan. E compania di famia aki ta un pionero den Aruba su Industria di Turismo desde 1960, y un di e pilarnan di exito di e empresa ta un fuerte relacion cu empleadonan.
Desde October di aña pasa, gerencia di De Palm Tours a sinta na mesa cu e sindicato FTA kende ta representa un grupo di 52 empleado cu ta traha den e departamento di bus.
E negociacionnan a bay den un bon ambiente, cu ambos partido demostrando comprension pa e circumstancianan economico y temponan dificil cu nos ta enfrentando.
Gerencia di De Palm Tours ta satisfecho cu den un tempo relativamente cortico a yega na un acuerdo mutuo, apesar cu ainda tin hopi reto nos dilanti. E compania ta confia cu, cu e acuerdo aki, e empleadonan di un di su departamentonan clave lo traha hunto pa e recuperacion necesario.
Gerencia di De Palm Tours kier gradici FTA y tur esnan cu di un manera of otro a contribui na e negociacionnan pa a yega na un CAO exitoso y pa traha hunto pa continua e legacia di excelencia den servicio cu e compania ta conoci pe.
