Un paso importante pa sigui fortalese Centronan di Cuido di Mucha

ORANJESTAD (AAN): Recientemente, Fundacion pa Nos Muchanan (FPNM) a reuni cu Bureau Minister encarga cu Centronan di Cuido di Mucha (CdCdM) den un ambiente ameno y constructivo cu vision pa futuro.

Durante e reunion, FPNM a presenta un bista general di e servicionan cu e organisacion ta ofrece, cu enfoke riba guia, sosten y desaroyo profesional pa tur Centro di Cuido di Mucha na Aruba registra na FPNM.

   Un parti importante di e bishita tabata dedica na e reto real cu e centronan ta enfrenta den nan trabou diario. FPNM a enfatisa su compromiso pa sigui traha hunto cu e sector pa identifica y implementa solucionnan sostenibel y practico cu lo beneficia tanto e centronan di cuido di mucha como e mayornan cu ta haci uzo di nan servicio, cual na final lo beneficia e mucha cu ta bishita e Centro.

   Ademas, FPNM a comparti su vision pa futuro, cu ta inclui fortalece capacidad di e profesionalnan den e sector di cuido di mucha, por medio di; guia structural na pia di trabou, programanan structural di calidad, sosten pedagogico y guia pa cumpli cu e exigencianan minimo di CdCdM.

   Durante e reunion, tambe a duna atencion na e diferente programanan cu FPNM ta ofrece pa mayornan cu yiu di 0 te 12 aña. E programanan aki ta enfoca riba fortalece mayornan den nan habilidadnan di lantamento di muchanan na un forma sensitivo y responsivo, promove desaroyo saludabel di mucha y stimula un ambiente di hogar safe y positivo.

   E reunion tabata fructifero, unda cu ambos partido a mustra compromiso pa sigui traha hunto na beneficio di bienestar y desaroyo di muchanan na Aruba. E dialogo a marca un paso importante den e continuacion di colaboracion entre FPNM y Bureau Minister encarga cu Centronan di Cuido di Mucha.