Un otro grupo mas di tata a finalisa proyecto 'Best Dad Ever'

CEDEHM y Fundacion Telefon pa Hubentud Aruba:

ORANJESTAD (AAN):  Desde 1 juni te cu 29 juni 2023 un otro grupo mas di tata a participa y termina e proyecto di Best Dad Ever. Best Dad Ever ta un proyecto cu ta stimula participacion di tata den bida di nan yiunan.         

            Fundacion Telefon pa Hubentud Aruba a facilita Best Dad Ever na un grupo di tata cu a ser recluta pa Centro di Desaroyo di Hende Muher (CEDEHM).

            Banda di e servicionan cu CEDEHM ta ofrece na hende muher nan na Aruba pa desaroya nan mes, CEDEHM tambe ta ofrece diferente servicio na hende homber. E hende homber den relacion y/ of den famia, ta importante den e sosten pa hende muher su desaroyo. Basa riba esaki CEDEHM a acerca Fundacion Telefon pa Hubentud Aruba pa facilita Best Dad Ever na un grupo di tata.

            E tatanan cu a participa a ricibi diferente tips, informacion y conocimiento pa asina nan por ta mas involucra ainda den educacion di nan yiunan. Tambe e tatanan a trece nan experiencia y preocupacionnan dilanti, nan a enfoca riba kico  nan a ricibi den nan educacion cu nan ta desea di sigui cune y kico nan no lo implementa den e bida di nan yiunan y nan a intercambia di experencia cu otro. Best Dad Ever ta enfoca riba e importancia  pa e tata ta involucra den bida di su yiunan.

            Na final e tatanan cu a participa na Best Dad Ever a ricibi un certificado.

            Un danki ta bay na Fundacion Telefon pa Hubentud Aruba pa facilita Best Dad Ever na Centro di Desaroyo di Hende Muher. Tambe un gradicimento ta bay na Famia Planea Aruba y Partera Michael Quandt pa nan participacion durante Best Dad Ever.