Un mundo sin Abeha ta manera un desierto sin cuminda

Fundacion Proteha Abeha Aruba

ORANJESTAD (AAN): Fundacion Proteha Abeha Aruba "FPAA" a wordo funda na 8 di Juli 2021, cu e meta pa rescata abehanan na Aruba; yuda nos abehanan sobrevivi; yuda y siña Pueblo di Aruba e importancia di nos abehanan.

            FPAA ta un team cu a cuminsa yuda e abehanan haya un lugar safe pa por biba aki na Aruba. Desde 2007 a cuminsa duna informacionnan na scol y sectornan cu ta hasi labor den aire liber, specialmente con pa actua ora di ricibi bishita di abeha na cas of na pia di trabou. Comunidad mester ta conciente cu ecosistema no por sin e insecto super importante aki.

            Actualmente FPAA tin tres miembro, presidente ta Jhowell Maduro; secretaria ta Edseline Raphaela y Cherylaine Maduro ta fungi como Tesorero di e fundacion.

Abeha tin un importancia hopi grandi aki na Aruba y rond mundo, nan ta polinisa matanan di fruta y berdura y tambe flor nan di mata nan cu nos animal nan tin mester pa por biba, alaves ta yuda mantene e ecosistema den e rumbo pa sigui existi na mundo. Si abeha mester desaparece na mundo of Aruba mes, e ecosistema lo termina completo y ser humano lo desaparece poco poco, maximo 2 pa 4 aña pa sobrevivi.

            Actualmente tin 3 tipo di abeha na Aruba. Honey bee's Abeha cu ta produci honing, Leaf cutter ta un tipo di abeha cu ta corta blachi di mata pa traha su cas y abeha paisa, ta un abeha chikito preto cu blanco, ainda FPAA no por a identifica esaki di cerca (solamente ricibi bishita na flor nan na lugar nan). E abeha paisa ta un nomber cu FPAA a pone p'e pa motibo e ta un abeha hopi lihe den su vuelo, alaves ta dificil pa por topa cu su neishi (tambe ta polinisa).

            Jhowell Maduro ta conta cu tin biaha nan ta haya yamada di un 'swarm' di Abeha cu recien a yega na cas di e persona, scol of compania, y tin biaha ta casonan cu e abehanan ya a establece nan mes pa hopi tempo caba. "Semper ora nos yega na e cas of lugar, nos ta wak e situacion pa wak ki material nan nos mester usa. Abeha nan por ta hopi pasivo y pero tambe agresivo. Ta depende con nan ta ricibi e trato di e trahado. Tin dia nos ta haya situacion cu ta di Maribomba tambe, cual tin hende cu ta bruha ainda of no sa diferencia entre Abeha cu Maribomba. Ambos nos sa resolve e situacion.

            FPAA ta conseha cu na momento cu un hende topa cu un grupo di abeha na cas of otro caminda, no zwaai man, no sinti miedo paso nan por sinti esey, no usa ningun perfume of kimico rond di nan, desordo tambe por hasi nan bira agresivo, si tin cacho cerca cu ta hopi bruto of druk tambe por ta un peliger pa e animal, y mester hala e cacho otro caminda pa su seguridad. Ta importante pa corda cu abehanan ta biba pa proteha e Reina y su cas.