PUNTO FIJO: Un team di vigilancia y observacion di parha, a descubri un meuchi nobo na peninsula di Paraguana, na estado Falcon.
E registro aki a bira e di cuatro meuchi di e genero Larus cu a wordo detecta na Venezuela. Ta trata di un especie conoci como Meuchi Cushinado, of manera e autornan di e descubrimento a yame, ‘Gaviota Blanquinegra’. Pa su nomber cientifico e ta conoci como ‘Larus dominicanus’, y aunke e ultimo nomber aki ta parce di tin relacion cu Republica Dominicana, e no ta bin di eybanda mes. E parha aki ta hopi comun den hemisferio zuid, na entre otro Antarctica, Madagascar, y na Sur America bo ta haye hopi mas biaha na Argentina.
Dia 18 di Juli 2021 a wordo confirma e prome registro pa Venezuela di e especie aki, segun e corant El Nacional a indica. E registro a ser haci dia 24 di Juni 2021 door di Luis A. Hernandez na e istmo di Paraguana, Falcon, na un plas di awa dushi cu a forma debi na tuberia di awa principal di e peninsula cu ta lek.
Na comienzo nan a identifik’e como un Gaviota Dorcinegra Menor (‘Larus fuscus’). Pero via di trabaonan cu e team di observador di parha ta haciendo na estado Falcon, a logra di haya un mihor potret cu a permiti nan determina cu esaki ta un especie nobo pa Venezuela.
Dia 17 di Juli, como parti di e Censo di Parha Aquatico haci pa Caribbean Waterbird Census (CWC) na peninsula di Paraguana, e team consistiendo di Francisco Contreras, Luis A. Hernandez, Vanessa Salas, Angel Mora, y Freddy Velasquez, nan a haci registro un biaha mas di e specie aki y saca mihor potret di dje.
Ora cu a bay check cu expertonan riba Social Media, un otro conocedor di parha, esta Sabino R. Silva a indica cu esaki ta un especie totalmente diferente, y esey a pone cu nan a dura algun dia mas ta consulta cu expertonan riba e especie aki, te ora cu nan tur ta di acuerdo cu esaki di berdad ta un Meuchi nobo pa Venezuela.
