Minister Ursell Arends a comenta:
ORANJESTAD (AAN)—Minister Ursell Arends, titular di Medio Ambiente, a duna di conoce den entrevista cu DIARIO, cu e ta trahando cu un compania Hulandes, pa loke ta trata e dump di Parkietenbos.
E compania ya caba a bin Aruba haci su prome inspeccionnan y dentro di algun siman gobierno lo haya e documentacion final y dentro di poco lo cuminza cu e saneamento di Parkietenbos.
Arends a bisa cu e proyecto aki lo cuminza e aña aki mes, unda lo transforma e area aki completamente y dun’e un funcion tanto pa naturaleza como pa un parke di panel solar.
E mandatario a bisa cu tin tres hayazgo cu mester wordo atendi dentro di corto tempo, prome cu sanea e area mes y esey ta e trabao cu nan ta bay haci dentro di poco, cuminzando e aña aki ainda.
Arends a splica cu riba e presupuestonan di 2023 y 2024 tin un total di 6 miyon florin ubica pa atende cu e saneamento di e dump pa asina por tape completamente, recupera e area aki y dune otro destinacion. Esaki ta riba locual gobierno ta bay enfoca, y esaki ta bay trece un alivio grandi pa henter e bario y su habitantenan y henter Aruba, y tambe pa e naturaleza pasobra e seroe aki ta e prome bista cu nan tin ora di drenta Aruba y sali tambe.
