Buki ‘Maternidad’ ta contribui na pilot di intercambio cultural den reino

ORANJESTAD (AAN): E modelo y actriz Zuleika Coffie di Aruba, a entrega su buki quadrilingual (den 4 idioma) “Maternidad” na co-burgemeester di Deventer, Sr. Marcel Elferink,

como acto di apertura di e exposicion “Destino Pa Soño”, auspicia pa Oranjevereniging.

   Oranjevereniging a ofrece cuminda caribeño, cu fundacion AABA (Antillaans en Arubaans Beraad Apeldoorn a recomenda.

   “Maternidad” ta un buki publica pa LM Publishers, y e buki universal aki ta un proyecto di cooperacion entre Zuleika y e artista di Aruba, Gustave Nouel, cu cu apoyo di diferente otro artista Arubano.

   E exposicion di 25 artista regional, titula “Destino Pa Soño”, ta parti di un intercambio cultural entre ‘mama’ Hulanda y St. Maarten, entre Kunstcircuit y National Institute of Arts (NIA).  Na Kunstcircuit por mira te dia 16 di Juli arte cu ta busca connection cultural entre e diferente parti di Reino.

   Lilian Vos (Biblioteca) a coordina henter e proyecto piloto hunto cu directora di NIA y Gustave Nouel, iniciador di e proyecto, tabata 'consehero general'. Manon van 't Spijker di Base 4 Dance, a bay St. Maarten hunto cu algun bailarin y artista/docente Rob van Putten y Annemarie van Uden, despues cu Silvia Carty, Jonathan Van Anneman y Arlene Halley di National Institute of Arts a comparti nan experticio na Deventer.

   E artista/docente Silvia Carty a duna workshop tambe den estudio di “Kunstwerkt” na varios artista "especial", alumnonan di Marianne de Bakker. Galería Art Brut a organiza un subasta di arte pa apoya nan intercambio cultural cu St. Maarten. Tambe na artistanan cu Gustave Nouel a guia na asociacion di artista DAK, Silvia Carty a duna un workshop di Pop Art.

   Culminacion di e intercambio cultural tabata un presentacion den Deventer Schouwburg, di e proyecto interdisciplinario na St. Maarten, cu baile y arte visual (Art2Fuse) di Base4Dance/Manon y e artistanan Rob y Annemarie.

   E pilot ('grassroot') a logra, y awor lo cuminsa prepara intercambio cultural, cu mas parti di Reino, pa futuro. Tambe cu teatro, musica, moda, literatura y/o otro disciplina artistico. E iniciativa 'grass-root' di Gustave Nouel tin apoyo di coordinadora Lilian Vos (Biblioteca), Oranjevereniging (DOV), Stadhuis di Deventer, Fondo pa Participacion Cultural, Fundacion Kunstwerkt, Fundacion AABA y otro socionan.

   Apeldoorn: Tambe na Apeldoorn, recientemente, Zuleika Coffie y Gustave Nouel a entrega e buki di “Maternidad” na wethouder Sunita Biharie, como un acto di apertura di KOM.
   KOM ta un festival multicultural internacional nobo, cu a cuminsa na Apeldoorn na 2022, caminda varios cultura ta topa y tin hopi diversidad. Cu musica, danza, arte (performance), workshops, cuenta/poesia, moda, actividad infantil, exposicion y actividad di diferente cultura cu ta participa. Tambe cu cuminda di China, Turkia, Marroco, Etiopía, Libano, Indonesia, africa, islanan di Cabo Verde, Eritrea, Iran, Caribe, etc.

   KOM kier stimula encuentro colorido, cu tema di Naturaleza, Cultura y Diversidad. KOM ta ser apoya e.o. pa Amnesty, Energieke Maten, Zero Waste, IVN, Refugee Work, fundacion Samenspraak y Stimenz. Desde e prome aña, Gustave Nouel a ser invita pa haci 'street-sketch' na KOM.

   Na 2023 tabatin escritor di diferente pais, cu a lesa algo di nan buki pa publico por a haci pregunta despues. Actriz Zuleika Coffie, biba na Amsterdam pero representando Aruba, tabata un sorpresa. Cu hopi emocion Zuleika a comparti un historia intimo cu su poesia 'Respet', den e 4 lenga mas papia na Aruba. Publico presente a gusta e actuacion masha y a pidi Zuleika pa sigui lesa mas poesia. Un actuacion hopi exitoso... di e actriz Arubiano.

   Tambe ta un soño pa comparti “Maternidad” na Reino den Caribe. Maternidad (cu subtítulo: Di Soño pa Realidad), ta un proyecto di cooperacion den 'imagen y palabra' entre dos artísta profesional Arubiano reconoci. Un buki cu no ta unicamente un oda na maternidad universal (y particular), sino tambe e aspiracion pa yuda crea un brug entre e partinan Europeo y Caribense di Reino Hulandes y entre nan y resto di mundo, den e sentido artistico di e palabra.