Gobierno Hulandes nobo por pidi cooperacion special di Aruba
*Brote di nacionalismo renoba ta manifesta su mes na Hulanda
*Relacion cu Union Europeo y Caribe Hulandes a bira interesante
ORANJESTAD (AAN) — “Hulanda ta un cas habita pa Hulandesnan cu ta forma un famia. Semper tabata tin lugar pa bishitantenan hasta pa esnan cu mester pasa anochi pasobra nan ta den problema y no por bolbe nan cas di biaha.
Esaki ta parti di e posicion di e partido mas grandi di Hulanda, BBB.
E partido BoerBurgerBeweging ta papia un idioma sumamente simpel. Durante e ultimo diez aña, e demanda pa yudansa a bira asina grandi, cu e camber cu el a reserva pa tur cu ta bati na su porta, a yena.
E bida familiar di Hulanda mes a wordo afecta y por lo pronto e lo no por sigui brinda un cama na su amigonan den problema.
E declaracionnan cu a wordo haci prome cu eleccion pa Provinciale Staten, awor ta haya mas forsa na caminda pa eleccionnan nobo na November pa Tweede Kamer.
E ta ilustrativo pa e aire nobo cu ta supla na Hulanda y ta duna un bista cla, cu eleccionnan di Maart 2023 na Hulanda no a duna Prome Ministro Rutte salida, cu no ta manda su Gobierno cas.
Documentonan a wordo presenta na DIARIO pa ilustra e posicion di e partido BoerBurgerBeweging, cu a causa un cambio total den mundo politico Hulandes pasobra el a contesta cantidad di problema cu e Pueblo Hulandes tabata mira pa hopi tempo sin solucion.
E loke e partido BBB a presenta durante eleccion a mishi directamente cu sentimento di hopi Hulandes sigur despues cu Omicron y Ukraine sigui pa e recesion di 2022, a afecta e Pueblo enormemente.
Ya prome cu esaki e hemchi politico a yena loke a keda, segun informantenan cu ta indica cu e decisionnan na urna electoral pa Provinciale Staten, no tabata algo di un momento.
Actualmente na tur provincia por mira refleho di eleccionnan 2023, cu participacion di BBB den casi tur constelacion di gobierno y representacion di pueblo regional.
“BBB a sa di expone e dolor di e Pueblo Hulandes, cu awor ta bini cu su exigencianan pa e bida di e Hulandes por ta central den gobernacion,”informantenan a indica.
Manera a wordo mustra tur pais cu ta mantene relacionnan cu Hulanda mester tene cuenta cu e decision di pueblo Hulandes durante e eleccionnan pa Provinciale Staten.
Na practicamente tur provincia na Hulanda, BBB a cuminsa forma e base pa su participacion den gobernacion regional manera eleccion na Maart 2022 a exigi.
VVD a bira e perdedor y awor tin un dirigente, cu mester contra su propio desaroyo den bida pa e atende cu e opinion mayoritario di e Pueblo Hulandes.
E partido di Prome Ministro Mark Rutte, manera ya DIARIO a anuncia, a dicidi cu e ta sostene Dilan Yesilgöz pa e bira e dirigente nobo di VVD.
Dilan Yesilgöz a nace na Ankara, Turquia y como migrante a yega Hulanda.
E parti fastioso di e asunto ta, cu Yesilgoz, lo mester actua hustamente contra migrantenan cu a yega Hulanda pa crea un bida nobo, mescos cu su persona a haci.
Pa e plannan pa restablece e calidad di bida di e Hulandes por wordo realisa, mester di un compromiso cu paisnan di Union Europeo tambe.
E tratadonan di Union Europeo lo ta habri caminda pa violacion di reglanan di migracion y sigur riba tereno di asilo politico.
Cooperacion cu Europa pa resolve problemanan serio manera asilo politico y migracion ta importante mescos cu e cooperacion cu BBB lo mester busca na Aruba pa cera e entrada pa Hulanda via e ruta di Aruba.
Pa gobernacion nacional na Hulanda sigur BBB mester atende tambe cu e pakete di e paisnan den Caribe mientras eleccion ta yega mas cerca y busca solucion pa tema comun.
Vivienda no solamente ta sinti e impacto di cantidad di trahador pero tambe e cantidad di estudiantenan di paisnan extranhero cu kier sigui nan estudio na Hulanda y asina ta crea mas exigencia.
Tin un interes internacional pa studia na Hulanda y esaki ta afecta e necesidadnan di e studiantenan di Hulanda y di Reino.
Studiantenan di Aruba segun informantenan sigur ta bira motibo pa discusion den Reino Hulandes y sigur pa BBB cu ta duna amplio atencion na e problemanan general di studiante na Hulanda.
Manera informantenan a indica na e momentonan aki cambio ta tuma lugar directamente den e panorama politico regional di Hulanda cu entrada di BBB den gobernacionnan regional na tur provincia practicamente na Hulanda.
BBB mester demostra su seriedad na e provincianan na caminda pa eleccionnan pa November 2023 ora BBB lo participa directamente na eleccionnan pa Tweede Kamer y Gobierno Hulandes y di Reino.
