Un grupo musical hubenil di Schakel College a entretene publico cu un presentacion unico

ORANJESTAD (AAN): Tabata Diasabra atardi, cu DIARIO tabata presente na Restaurant Arte Murano na Ayo, pa asina scucha presentacion di un grupo di hoben talentoso di scol, kendenan a forma nan mesun banda.

   Ta trata aki di e banda hubenil “Yassified Chicken Nugget”, y DIARIO a nota cu tin 3 cantante, dos dama riba cuarta, un bajista, uno riba guitara electrico, un baterista, un dama hoben na keyboard, y un hoben masculino tambe na otro keyboard.

   Net e momento ey nan tabata cantando e cancion ‘I Will Survive’ di Gloria Gaynor.  Y e tabata un cantamento perfecto, cu bon tonada, y pitch cu a imita e cancion original na un forma fenomenal.

   DIARIO a entrevista e docente Petra Abeln kende ta duna les di musica na Schakel College na Aruba.  Esaki ta un scol priva pa alumnonan di MAVO, HAVO, y VWO.

   Segun docente Abeln, tur cos a cuminza despues di horario di scol.  E asina yama ‘Naschoolse aktiviteit’ aki guia e alumnonan aki den musica, y asina nan a cuminza cu un grupo musical.

   E gruponan aki ta di Schakel College.  Segun docente Abeln, nan a cuminza pa prome biaha como grupo, dunando presentacion pa temporada di Pasco.  Y el a haya bon acogida.

   Tambe nan a duna presentacion pa un actividad di HAVO-3 den Cas di Cultura, titula ‘Treasure Island’, y cada biaha nan habilidad artistico tabata sigui mehora.

   E grupo musical riba nan mes ta escoge cual cancion nan ta toca, y asina ta haci entrenamento pa perfecciona e cancion completo.  Docente Abeln ta brinda asistencia aki tin biaha.

   A compronde, cu e cancionnan cu e hobennan aki a trece dilanti, ta cay den bon tera cerca tur esnan cu a scucha nan presentacion.

   Como cu docente Abeln ta regresando Hulanda, e ta convenci cu nan lo bay haya un otro guia cu lo duna nan bon asistencia y sigui cu e bon rumbo.  El a menciona e nomber di Tony Parejo cu ta bay duna nan guia.  Tin indicacion cu e grupo aki lo bay hasta crea un nomber nobo, pa asina nan no sigui mas como ‘Banda di Scol’.  Sino un banda cu lo duna presentacion unda cu nan tin mester di nan.

    DIARIO a keda agradablemente sorprendi pa e calidad di sonido, bon tonada, y dushi musica cu nan a produci atardi na Restaurant Arte Murano na Ayo.