ORANJESTAD (AAN): Un di tres dosis di e vacuna Pfizer/BioNTech contra Covid-19 lo por impulsa di forma significativo e proteccion contra e variante Delta, ya cu e lo por aumenta te hasta 100 biaha e neutralidad di e vacuna contra e variante, segun ta sugeri datonan publica pa e fabricante.
E datonan aki ta sugeri cu e personanan entre 65 - 88 aña, lo tin un aumento di hasta 11 biaha den e nivel di anticurpa contra e variante Delta.
Den personanan di 18 - 55 aña e aumento aki lo ta di mas di cinco biaha mayor cu despues di un di dos dosis.
Ta existi un "potencial premira pa un aumento di hasta 100 biaha den e neutralisacion di e variante delta despues di e di tres dosis, den comparacion cu e dosis anterior, segun investigadornan di Pfizer.
E datonan aki ta mustra cu e nivelnan di anticurpa ta hopi mas halto despues di un di tres dosis, ademas a anuncia cu ta preparando pa haci pruebanan riba un version di e vacuna pa ataca e variante delta.
Un estudio presenta algun siman pasa lo a sugeri cu e vacuna di Johnson & Johnson lo por necesita di igual manera un di tres refuerso.
E variante Delta ta e version mas contagioso te cu aworaki di Covid-19, ya cu segun expertonan e ta hasta un 60 % mas contagioso. Delta ta e variante cu ta predomina na Aruba na e momentonan aki.
