ORANJESTAD (AAN) – Chris Goedhart, Beleidsmedewerker na Departamento di Salud (DVG), a señala durante e Forum cu a tuma lugar na Tele Aruba, dirigi pa Cherryldine Buckley,
cu e ultimo cifranan di contagio di Covid-19, ta mustra cu e plamamento di e virus den comunidad ta mas halto cu den e turistanan.
El a señala cu hopi biaha, un turista ora e ta bay bek na su pais, e mester test y door cu nan ta test mas, por wak hopi caso tambe. Pero ta señala e hecho cu e turistanan ta keda pa un temporada cortico na Aruba, pero hopi hende local ta wordo contagia. El a subraya cu tur dos aspecto: keda pendiente di e turistanan pero cuida nos mes, ta hopi importante.
Otro pregunta cu a bin acerca ta: “Kico ta “Breakthrough Infections?” Ta wordo bisa cu e variante Delta ta causa esaki. Dr. Rodenburg a contesta splicando cu esaki ta ora un hende, apesar cu tin su dos dosis di e vacuna contra Covid, ta bira malo. El a expresa cu na Aruba tine y ta bay tin mas caso, pasobra e ta proteha contra Covid severo pero no contra tur tipo di Covid. Pero e Covid aki ta hopi menos severo.
Dr. Bert Rodenburg a pone como ehemplo Curacao unda tin 600 caso activo aworaki, y dos hende interna na Hospital. Na Aruba, na Mei, nos tabata tin 600 caso activo y 20 pashent na UCI y 20 pashent den piso, y esaki ta proba e efecto di e vacunacion. El a reitera cu Aruba ta bay haya mas caso di “Breakthrough Infections” pero generalmente, e no ta hopi severo.
