Minister di Husticia Arthur Dowers:
ORANJESTAD (AAN)-- Minister di Husticia mr. Arthur Dowers, den entrevista cu DIARIO a elabora tocante e acuerdo cu KPA y Respaldo kier a yega na dje, relaciona cu e atencion cu mester duna e personanan cu tin problema di salud mental.
E mandatario a bisa cu el a papia diferente bes cu Respaldo y KPA riba e asunto aki. Pero loke mester tene cuenta cu ne ta cu el a haci bishita eynan, pa por a mira e condicion di e lugar, den cual e mes a traha den pasado. El a subraya cu loke el a mira ta hopi tristo, con e lugar a bay hopi, hopi atras, compara cu loke e tabata antes, con hopi a wordo kita for di e parti di cuido di salud mental y toch e ta haci dolor.
“Mi ta mira cu nan ta haciendo esfuerzonan grandi cu poco recurso, nan ta papiando awo cu tin un construccion nobo, eynan nos a pidi pa amplia e posibilidad pa por atende cu crisis. Nos tambe ta trahando aworaki na un manera improvisa, pa bay wak con nos ta bay brinda e servicio den cuadro di crisis, pero tambe di ‘drugshulpverlening’ y e ora ey por sosode e trabao cu nan ta haci tambe. Mi ta kere mester ta hopi claro.”
“Mi no a scucha e sindicato bisa cu ‘nan no ta bay atende, sino cu nan lo no atende’. Esey a wordo bisa den prensa. Pasobra un di e tareanan principal di polis ta di atende cu situacionnan di orden publico si nan ta rekeri di nan. Ningun hende mester manda Polis pa haci’e. Esaki ta loke Polis ta huramenta pa haci. Kiermen, esey ta e opdracht cu nan tin pa haci bao responsabilidad di Minister di Husticia, y nos ta sali for di e punto di bista cu esey ta wordo cumpli cu ne”, e dignatario a declara.
E mandatario a señala cu e no a tende di Korp Chef, ni den ningun ley cu polis ta bay stop di haci e trabao primordial cu nan ta yama y, huramenta, pa haci.
“T’asina aki cu na momento cu tin un peliger of un disturbio den cuadro di siguridad y orden publico, si nan ta yama polis, polis tin cu bay. Na momento cu polis yega, e ta pidi asistencia di e crisis team. Tin casonan cu a conoci caba, y esey bo por planea hunto cu Crisis Team, of cu e FACT Team, bisa cu ta un hende conoci, pa ban hunto, nos ta atende cu ne”. E dignatario a reitera cu e punto di salida ta cu nan ta bay traha hunto pa yega na un miho resultado.
